Taxa Heydana Jorinî ya qezaya Gêlî ya Amedî de vizêr şan keya û serqoricî Selahattîn Umayî kerd ke cinîya ke tede zewijnaye ya qetil bikero. Umayo ke cinîye E.U. rê bi hawayêkê sîstematîkî şîdet kerdêne bi kardî hêrişê cinîye kerd.
Doman M.U. (13)o ke bîyo şahîdê serebûtî wexto ke waştêne dadîya xo bipawo pê çeke serqoricî birîndar kerd. Serqoricî wedarîya Nêweşxaneyê Dewlete yê Erxenî, cinîye zî gêrîyaye binê tedawî.
Leşkeran doman M.U. destbend kerd. Derheqê serebûtî de tehqîqat dîya destpêkerdene. Serebûtî ra dima leşkeran taxe girewte binê ablûqa. AMED
