Helwesta dijminane ya li dijî girtiyên ku dawî li çalakiya greva birçîbûnê û rojiya mirinê anîn, berdewam e. Xebatkarên girtîgehan û tenduristiyê li dijî girtiyan sûc dikin û muameleya xerab dikin. Hat zanîn ku bijîşkan serûmên şaş dane girtiyên di Girtîgeha Jinan a Bunyan a Kayseriyê û rewşa girtiyan nebaş e
Li zindanên bakurê Kurdistanê û Tirkiyeyê bi hezaran girtiyên ku ji bo rakirina tecrîda girankirî ya li ser Rêberê Gelê Kurd Abdullah Ocalan di greva birçîbûnê û rojiya mirinê de, li ser banga Ocalan dawî li çalakiya xwe anîn. Piştî bidawîkirina çalakiyan re jî girtî sewqî nexweşxaneyan tên kirin. Lê li gelek girtîgehan veguhastina girtiyan a nexweşxaneyan veguheriye îşkenceyê. Hat zanîn ku li Girtîgeha Jinan a Bunyan a Kayseriyê serûma şaş dane girtiyên jin.
KAYSERÎ
Di vê çarçoveyê de di roja şemiyê de li polîklînîka kampusa Girtîgeha Jinan a Bunyan a Kayseriyê mînakên xwîn, destava biçûk û EKG’ê yên girtiyan hatin girtin. Piştre jî çalakgerên bi navên Bêrîvan Bîtmen, Maşallah Erbey, Merge Polat, Sînem Oguz û Saliha Cebe ku zêdetirî 100 rojan di greva birçîbûnê de bûn, li heman polîklînîkê rastî muameleya xerab ên bijîşk û xebatkarên tenduristiyê hatin. Piştî ferz kirina kelepçeyê serûm dan girtiyan. Piştî dayîna serûmê jî rewşa girtiyan xerab bû. Tansiyona girtiyan bilind bû û girtî ji ser hişê xwe çûn û recifîn. Hat zanîn ku girtî Merge Polat êdî ketiye rewşeke wisa ku nekariye bêhnê bistîne. Hat zanîn ku rewşa Bêrîvan Bîtmen û Maşallah Erbey jî pir giran e û bi kursiyên bi teker diçin hevdîtinê. Hat ragihandin ku xebatkarên girtîgehê bi gotinên weke ‘heyfa serûmên em didin we’ li pey provokasyonan digerin.
KIRIKKALE
Li Girtîgeha Tîpa F ya Kirikkaleyê jî piştî greva birçîbûnê lêgerîn pir zêde bûye. Girtî rastî muameleya xerab tên û sewqên girtiyan tên taloqkirin. Daxwazên girtiyan nayên pêşwazîkirin û rojnameya Yenî Yaşamê nadin girtiyan.
AMASYA
Girtiyên li Girtîgeha Tîpa E ya Amasyayê jî sewqî nexweşxaneyê hatin kirin. Lê muayeneya bi kelepçeyê li girtiyan tê ferzkirin. Hat zanîn ku girtiyan tenê xwîn dane û piştre jî vegerandine girtîgehê. Hat zanîn rewşa Fethî Yaşa ku 53 salîye û di greva birçîbûnê de pir kîlo da pir xerabe û pirsgirêka wî ya dil heye. Rêveberiya girtîgehê li gorî rêvebera TTB’ê tevnagere û xwarinên divê neyên dayîn didin girtiyan.
TOKAT
Li Girtîgeha Tîpa T ya Tokat jî xwarinên ku divê di destpêkê de neyên dayîn didin girtiyan. Her wiha girtî tenê ji aliyê bijîşkên beşa lezgîn a 112’an ve tên kontrolkirin. Girtî sewqî nexweşxaneyê nehatine kirin. Parêzer, ji ber binpêkirinên mafan ên hatin jiyîn, dê îro careke din biçin girtîgehên Amasya û Tokatê.
ERZIROM
Li Girtîgeha Tîpa T ya Oltuyê jî 20 girtiyên ku dawî li çalakiya xwe anîn, sewqî nexweşxaneya dewletê hatibûn kirin. Hat zanîn ku girtî ji nexweşxaneyê hatin derxistin û şandin girtîgehê. Hat diyar kirin ku rojane kontrolên girtiyan tên kirin û rewşa girtiyan başe.
