Operasyona “Ewlehiya Domdar” a ku Hêzên Ewlekariya Hundirîn, Hêzên Sûriya Demokratîk (HSD) û Yekîneyên Parastina Jin (YPJ) di 6’ê mijdarê de li kampa Hol û derdora wê dest pê kiriye, bi xurtî didome. Qonaxa yekemîn a operasyonê ku tê de rûberên berfireh ên başûr û bakurê bajarê Holê hatin paqijkirin, bi dawî bû. Niha jî qonaxa duyemîn a paqijkirina kampa Holê destpê kiriye. Di operayona ku ji 6’an rojan ve dewam dike de, hêzan 73 çeteyên DAIŞ’ê girtin, gelek çek û cebilxane desteser kirin û 2 tunel ji bo veşartina çekan û çeteyan di hundirê kampê de, dîtin.
Di operasyonê de şervanên jin ên Yekîneyên Parastina Jin (YPJ) ku beşek ji wan ji pêkhateya ereb in, cih digirin. Şervana YPJˋê Bêrîtan Dêrî ya ji bajarê Bokemalê ye diyar kir ku operasyon bi awayekî serkeftî bi rê ve diçe û got: “Operasyon bi saya şervanên jin ên ku nûnertiya jinên ku ji aliyê çeteyên DAIŞ’ê ve rastî tundiyê û zilmê hatine, pêk tê.”
Şervana YPJˋê Cûdî ya ji Dêrazorê jî diyar kir ku heta niha di encama hevkarî û koordîneya baş a di navbera hemû hêzên leşkerî de û bi pêşengtiya şervanên jin, di operasyonê de encamên baş pêk hatine û got: “Em şervanên ereb heta pêkanîna tevahî armancên operasyonê û aştiya li herêmê, xebatê bidomînin.”
Şervan Cûdî Zagros a ji Holê jî destnîşan kir ku ew ji ber zilm û sûcên ku ji çeteyên DAIŞ’ê dîtine, tev li Odeya Operasyona Ewlehiya Domdar bûye û got: “YPJ’ê û hêzên leşkerî yên din dê heta girtina hemû çeteyan, têkbirina êrîşan û pêkanîna aştiyê li herêmê, li ser soza xwe bin.”
