Sîyasetmedarê cinîyî Sêvê Demîr, Fatma Uyar û Pakîze Nayîr ê ke Silopî de xoverdayîşê xoîdarekerdişî de şehîd bîyî ameyî yadkerdene
Endama Meclîsê Partîye yê DBPyî Sêvê Demîr, endama Kongreya Cinîyan ê Azadan (KJA) Fatma Uyar û Hemsereka Meclîsê Şarî yê Silopî Pakîze Nayîr qezaya Silopî ya Şirnexî de xoverdayîşê xoîdarekerdişî de 4ê çeleyê 2016î de wexto ke waştê taxêke ra derbazê taxêka bîne bikêrê bi guleyanê wesayîtê zirxînî ameyî kiştene. Sêvê Demîr, Fatma Uyar û Pakîze Nayîr serrgêra 4. de ameyî yadkerdene. Seba her hîrê sîyasetmedaranê kurdan rêxistina HDPyî ya Silopî kombîyayîşêkê yadkerdişî serûber kerd.
Dadîyanê Uyare û Nayîre, wekîlê HDPyî Ebru Gunay û Hasan Ozguneş zî tewrê kombîyayîşî bîyî.
Dadîya Sêvê Demîr Sakîne Demîr yadkerdişî de qisey kerd û vat: “Ganî şarê kurdî seba azadîya xo dest bido yewbînan û pîya têkoşîn bikê. Na serre şarê kurdî ser bikewo û do azad bibo. Ma edalet, aramîye û haştîye wazenê. Me nêwazenê kesêk zî bimiro.”
Parlementera HDPyî Ebru Gunay zî ard ziwan ke Qirkerdişê Silopî dewamê Qirkerdişê Parîsî yo ke 9ê çeleyê 2013î de 3 sîyasetmedarê cinîyî ameyî qetilkerdene. Gunaye îfade kerd ke dewlete her ca de cinîyanê azadan kişena.
Ebru Gunay vat: “Vatiş qîm nêkeno ke ma qala her 3 embazanê xo bikê. Ez rîyê xo bi rêzdarî verê înan de ana war. ŞIRNEX
