Operasyonê leşkerî yê ke keweno hirêgoşeyê Amed, Mûş û Çewlîgî yê Zozanê Şênî de 8ê teşrîna peyêne de destpêkerdbî dewam keno
Badê ke 8ê teşrîna peyêne de Herêma Zozanê Şênî ke keweno hirêgoşeyê Amed, Mûş û Çewlîgî de operasyonê leşkerî destpêkerdbî, xeylê daristanî ameyî veşênayene. Şewatê daristanan aye roje ra nata dewam keno. Herêmê ke şewat tede esto hetê leşkeran ra ameyî girewtene û leşkerî destûr nêdanî ke kesêk mudaxaleyê şewatî bikero. Operasyonê leşkerî de xeylê tîmê taybet û qorîcîyî zî sewqê herêma operasyonî ameyî kerdene. Ame zanayene ke mabenê wirdî hetan de ge-ge şer vejîyeno û herême hewa û bejayî ra yena bombardûmankerdene. Netîceyê bombardûmankerdişî de reyna adir kewt daristanan. Vîdeoyê ke hetê hemwelatijan ra ameyî antene de asîyeno je herême de du berz beno. Labelê nîno zanayene ke şewat ameyo hewnakerdene ya nê.
Operasyono ke herêmanê dewanê Eskar, Gelîye Deyika, Gelîye Mezraxuş û Kontarê Koyê Dorşinê, Sere Sip û Hovîtê, Mezrika Zovan, Kerengan, Zozanê Şênî û Reylê de destpêkerdbî dewam keno. AMED
