Navenda Nûçeyan |
Piştî Çînê, yek ji welatên herî zêde coronavîrûs lê belav bûye, Îran e. Heta niha li Îranê ji ber vîrûsê zêdetirî 66 kes mir in. Li Îranê wezîr jî di nav de zêdetirî hezar û 500 kes bi coronavîrûsê ketine. Hat ragihandin ku endamê Meclisa Îranê û di heman demên de şêwirmendê pêşengê olî yê Îranê Ayetullah Elî Xamaney yê bi navê Muhammed Mîrmuhammedî jî bi coronavîrûsê ket û mir.
Yekem care ku li Îranê rayedareke payebilind ê Îranê ji ber coronavîrûsê jiyana xwe ji dest dide.
Hêjayî bibîrxistinê ye ku heta niha li Îranê serokê Komîsyona Ewlehiya Neteweyî û Polîtîkaya Derve ya Meclisa Îranê Mucteba Zunnûr û 4 parlamenterên din, Alîkarê Serokomarê Îranê Masume Îbtîkar, Alîkarê Wezîrê Tenduristiyê Îreç Herîrçî û Rektorê Zanîngeha Tipê ya Komê Muhammed Riza Qadir jî bi vîrûsê ketine. Di heman demê de yek ji pêşengên olî yên Îranê û konsolosê Vatîkanê yê Îranê yê berê Huccetulîslam Hadî Husrevşahî jî ji ber coronavîrûsê mir.
