Parlementerê CHPyî yê Stenbolî Sezgîn Tanrikûlû şî zîyaretê hemsereka KCDyî û parlementera HDPyî Leyla Guvena ke 112 rojî yo seba wedarnayîşê tecrîdê serê Rayberê PKKyî Abdullah Ocalanî grevê vêşanîye de ya.
Parlementerê Partîya Şar yê Komarî (CHP) yê Stenbolî Sezgîn Tanrikûlû, hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvena ke 112 rojî yo seba wedarnayîşê tecrîdê serê Rayberê PKKyî Abdullah Ocalanî grevê vêşanîye yê bêdem û anêgêrayîşî de ya, zîyaret kerd.
Tanrikûlû zîyaret de Guvene reyde qisey kerd û va: “Ma seba şima û hepsîyê ke grevê vêşanîye de yî etirîyenî. Ez umid kena ke no proses de kesêk zirar nêvîno.”
Leyla Guvene zî Tanrikûlûyî rê wina va: “Talebê mi yê qanûnî estî û heta ke nê talebê mi nêrî bicaardiş, ez çalakîya xo ya grevê vêşanîye dewam kena. Berpirsîyarîya serê milê mi zaf giran a. Zindanan de 300 hepsîyan ra zêde hepsîyî û xeylê embazê mi yê teberê welatî grevê vêşanîye de yî. Rewşa înan krîtîk a. Tecrîd tena serê Birêz Ocalanî de nê pêroyê Tirkîye de pê yeno. Embazê ma yê parlementer seba bale antişê serê çalakî waştî ke rayîrşîyayîş pê bîyarî, labelê hetê polîsan ra girîyayî binê ablûqa. Fotografê ablûqaya polîsan, fotografê tecrîdî yo. Cok ra hemverê tecrîdî de vejîyayîş, raştîya xo de wayîrvejîyayîşê demokasîya Tirkîye yo.” AMED
