Şaredarê Qezaya Pulurî Mustafa Sarigulî dîyar kerd ke cayê ke teblîgat erşawitî rê ruhsatê madenî dîyayo û wina va: “Na herêma de herêma afetî ya de do hewzê sîyanurî bêro awankerdene û na herême do senî bêra pawitene?” Keyayê Dewa Yeşîlyazi Husamettin Ateşî zî ard ziwan ke xebatê madenî yê Koyê Mûnzûrî ke 300 metre dûrê înan o, do zirar bido înan û hemwelatijê herême tesilî destûr nêdî na rewşe
Qeymeqamê Pulurî dewanê Aslandogmuş, Kuşluca, Yarimkaya, Yeşîlyazi, Gozeler, Yaylagunu, Mollaalîler û Buzlutepeyî sey herêma afetî îlan kerd û waşt ke hemwelatîyî dewanê xo veng bikerî. Serra 1970î ra nata her serr dewijê nê dewan hezaz, aşût û rîskê rijnayîşî reyde rî bi rî yî û muracatê komeleyan danî. Her serre teblîgat keyayê dewan rê yeno erşawitene ke dewijî nê dewan veng bikerî. Ame dîyarkerdene ke dewanê Aslandogmuş, Kuşluca, Buzlutepe û Yaylagunuyî de rîskê hezazî esto û dewanê herêmê koyî de zî rîskê kewtişê aşûtî esto.
Yena waştene ke dewê Yarimkaya, Gozeler, Molaaliler, Buzlutepe û Kuşlucayî bêrî rijnayene û ame vatene ke nê dewî raşteyê madenî yî. Dewa ke tewr zêde bale ancena dewa Buzlutepe ya. Dewa Buzlutepe netîceyê polîtîkayanê dewlete de tewrê 33 dewan serra 2000î de ameya vengkerdene.
Serra 1984î ra nata teblîgat yeno erşawitene
Hemwelatijê mezraya Kazançî yê dewa Yaylagunuye ke nêwaş nameyê xo bido, dîyar kerd ke Yarimkayaye de serra 1985î de aşût kewto û cok ra herême sey herêma afetî ameya îlankerdene. Dewij qiseykerdişê xo de wina va: “Mezraya ma zî kewena mîyanê herêma afetî. Seba ke ma dewa xo veng bikerî serra 1984î ra nata teblîgat yeno erşawitene. Ma tu rey no qerar qebûl nêkerd û ma do dewa xo vengnêkerî.”
Qeymeqam teblîgat erşawit 8 dewan
Şaredarê Pulurî Mustafa Sarigulî zî ard ziwan ke qerarê vengkerdişê dewan serra 1970î ra nata esto û wina va: “Serra 1992 herêma Mercanî de erdlerz pê ame. Xeylê awanîyî zirar dîyî. Hemwelatijî bi deynan awanîyanêxo newe kerdî. Qeymeqam teblîgat erşawit 8 dewan. Dem bi qerar newe kenî û reyna erşawenî.” DÊRSIM
