Namzedê Şaredarîya Rezanî yê DEM Partî Sîraç Çelîk û Leyla Ayaz ê.
Sîraç Çelîk 1963 de qezaya Pasurî ya Amedî de dadîya xo ra bîyo. Ey bi serran sendîkaran de karî kerdî û ronayoxanê Platformê Kede û Demokrasîyî yê Amedî ra yew o.
Sîraç Çelîkî ANFyî rê qalê projeyanê xo kerd.
Çelîkî vist vîrî ke qeyûmî dest nayo Şaredarîua Rezanî ser û vat: ”Şaristanê ma destê qeyûman de xera bi. Ma soz danê ke şarê xo destê qeyûman ra bixelisnê. Qezaya ma de meseleyî zaf ê. Sîstem tîya de polîtîkayanê şerê taybetî ano ca. La ma do bi destekê şarî pêro meseleyan safî bikerê. Ma do tim pêşnîyazanê şarê xo esas bigêrê. Erdlerzê parî de Rezanî zî zaf zerar dîbi.
Hetê bînî ra şaredarîya qeyûmî de hema zî gendelî û bêusulîyî yenê kerdene. Ma do ê kesanê ke seba menfaetanê xo çimeyanê şarî şuxilnenê teşhîr bikerê. Şaristanê ma de seba karkerîya serrwextî koçkerdişî zaf ê. Seba ney zî ma do kooperatîfan awan bikerê. Ancî ma do meseleya înşeatî zî çare bikerê.”
