Nê aşmanê peynîyan de, yew het ra operasyonê yê Başûrî rojev de cayê xo girewto. No operasyon; nizdîyê di aşman o ke dewam keno. Aseno ke no operasyon, hima epey yew deme ko dewam bikero. Yewna het ra zî nê operasyonî bes nêveynenê, wazenê ke yewna cephe zî Rojawan de biakê.
Vera şono malîyetê nê cengî vêşî beno. Her roje, cenazey hewanênê. Şarê Tirkîya; yew het ra lajanê xo, no ceng de vênî kenê. Yewna het ra no ceng; bi pereyê (bacê) şaran fînanse beno. Yewna het ra zî vayî/vayey û enflasyon sereyê xo girewto şono. Şarê Tirkîya, adeta bi veyşaney terbîye benê. Xora sebebê na xizaney û veyşaney; na polîtîkaya cengî ya. Yew vatişê verînanê ma esto, vanê; “Ronê keçêlî, rayna sereyê keçelî ra gênê.” Welhasil heme hewa ra faturaya nê cengî; rayna şaranê Tirkîya rê birêna.
Hukmatê AKP-MHPyî, pey lajanê şaran camêrdey keno. Cor ra hetan cêr, ez înan nêkena ke yew lajê xo raykê nê operasyonan. Mesela, gelo lajê yew wekîlê înan, nê operasyon de ca gêno? Gedeyê înan; ya yew cayo bi emnîyet de leşkerî kenê, ya zî bi bedelê peran leşkerî kenê. Çunku yê ganê xo, zaf bi qîymet û şîrîn veynenê.
Semedo ke sîyasetê îqtîdarê AKP-MHPyî xetimîyayo. Wazenê ke, bi nê operasyonan vengê muxalefetê bibirnê û înan lete-lete bikê. Wazenê ke, bi nê operasyonan cayê îqtîdarê xo sexlem bikê. Hetta eke mûafaq bibê ko dima zî şêrê weçînayîş. Semedo ke polîtîkaya nê sîstemî; înkar û îmhayê ser o awan bîya, îqtîdarê AKP-MHPyî, no zemîn ra îstîfade keno û no zemînê ser o şer de israr keno.
Aseno ke no hukmat billakerdişê gonî ra mird nêbeno. Dewleta Tirkîya, 2018 de Efrîn, 2019 de Girê Sipî û Serêkanî girewt binê destê xo. Serekkomar Recep Tayyîp Erdogan vano ke; “Ma Tel Rifat û Minbîcî terorîstan ra pank kenê. Ma bi qedeme- qedeme, sewbîna mintiqayan de zî ina/wina hewa dewam kenê. Kam destek dano ma, kam vernîya ma de vindeno bellî beno.” Ewta de wazeno ke, no operasyon de, destekê NATOyî bigêro. Erdogan bi nê vatişanê xo şantaj NATOyî zî keno. Yanî rasta rast vano ke, “Semedo ke Swêd/Îsweç û Fîlandîya/Fînlandîya, bibê endamê NATOyî, hem nê wirdî dewletî û hem zî endamê NATOyî yê bînî ganî hetê leşkerî ra destek bidê Tirkîya.” Eşkera yo ke, Serekkomar Erdogan, bi nê şertan, Endamîya Swêd/Îsweç û Fîlandîya/Fînlandîya qebul keno.
Aseno ke Erdogan û hukmatê ey, kurdo azad û bi serbixwe/serbixo nêwazeno. Hetta eke firset veyno û Amerîka û Rûsya ra îzîn bigêro, wazeno ke, bi temam Rojavayî îşgal biko/bikero. Semedo ke îradeyê kurdan berteraf biko, adeta heme dinya ra ardim wazeno. Gelo tikê eyb nêbeno?
Goreyê ma, na polîkaya cengî, bind ra şaş a. Şima hetan Qanûno Bingeyî de, nasname û ziwanê kurdan qebul nêkê, ma esla îtîbarê şima nêkenê. Rasta ey, ay a ke şima xo rê çi wazenê se, ganî şima kurdan rê ay çîyan biwazê. Şima hetan heq û huqûqê kurdan û yê şaranê binan qebul nêkê, şima xo altin ro vejê zî yê şima veng a. Şima bi na polîtîkaya xo, peynîya xo zî anê.
Goreyê ma şima esla mûafaq nêbenê. La hasbelqeder şima bi demkî mûafaq bibê zî na mesela, esla bi na polîtîkaya şima çareser nêbena. Şima hetan fek polîtîkaya înkar û îmhayî ra nêdê, şima esla sernêkewenê.
Zextê serê hunermandanê kurdan
Nê rojanê pêynîyan de, hunermendanê kurdan, seba konseran û tîyatroyan murecatê tayê qeymeqaman û walîyan kerdê. La qeymeqaman û walîyan îzîn nêdayê nê hunermendan. Nê qeymeqamî û walîyî, goreyê polîtîkaya hukmatî têgeyrenê. Yanî na polîtîkaya yasaxî, esas bi xo polîtîkaya yê Hukmatê AKP-MHPyî ya. Na Dewlete; ne ziwanê ma, ne nasnameyê ma, nê deyrê ma, ne tîyatroyê ma, ne zî kulturê ma qebul kerdo.
Heqîqetê Hedîseyê Kobanê
Îqtîdarê AKP-MHPyî wazeno ke bi qûmpasan partîya HDPyî biqefilno. Mesela HDPyî, Dewaya Kobanê ra sucdar kenê û wazenê ke bi na dewa HDPyî biqefilnê. HDP semedo ke heqîqetê Hedîseyê Kobanê vejîy meydan, yew pêşnîyazname dabi Serekê Meclîsê Tirkîya. La no pêşnîyazname, bi rayanê wekîlanê AKP û MHPyî red bi. Şima, bi sucdareya Dewaya Kobanê ra, Hemserekê HDPyî yê verî Selahattîn Demîrtaş û Fîgen Yuksekdag tede, bi seyan sîyasetkar û aktîvîstê HDPyî dekerdê zîndanan. La şima nêwazenê ke heqîqetê Hedîseyê Kobanê vejîyê meydan. Partîya HDPyî, wazena ke meseleyan bi sîyaseto demokratîk çareser bika, la tehamulê şima, bi sîyasetê demokratîkî zî çin o.
Ceng, çende hera bibo, hina zaf gonî vila bena û xizaney û veyşaney hina vêşî bena. Ceng de israr, yew gureyê aqilî nîyo.
