Rojnamegeran û sîyasetmedaranê cinîyan îfade kerd ke yewîya neteweyîye ya kurdan ganî bêra awankerdene û vatî: “Azadîye bê yewîye nêbena. Seba yewîye firsendêko zerdin vernîya kurdan de yo.”
Dima ke dewleta tirkî vera Rojawanî dest pê hêrişan kerd waştişê seba yewîya neteweyîye ya kurdan newe ra bi rojdem. Rojnamegeran û sîyasetmedaranê cinîyan girîngîya yewîya neteweyîye ernnaye.
Parlementera Partîya Demokratîke ya Şaran (HDP) ya Mêrdînî Pero Dundare va: “Ganî kurdî vera hêrişan bibê yew. Şertê nikayînî mecbur kenî ke yewîya neteweyîye bêra caardene. Nika Rojawan de Başûrê Kurdîstanî de îşxal dewam keno. Ganî ma vera qirkerdişan bibê yew. Yewîye bi partîyêke yan zî dezgehêk awan nêbena, ganî çar parçeyanê welatî de her kes seba yewîya neteweyîye bixebito. Şarê kurdî seba yewîya neteweyîye amade yo û ganî hîna zêdêr partîyanê xo ser o teda bikê ke yewîya neteweyîye bêra awankerdene.”
Kurdîstan de statûyê Kurdîstanî
Aktîvîsta Tevgerê Cinîyanê Azadan (TJA) Meleke Ruşene qiseykerdişê xo de wina va: “Yewîya Neteweyîye ra ber hewceyê kurdan bi çîyêkî çin o. Kurdîstan de statûyê Kurdîstanî yeno astengkerdene. Coka ra teqez kurdî yewîya neteweyîya xo awan bika.”
Ganî waştişê şarî bêrî caardene
Vervatoxa Platformê Rojnamegeranê Cinîyan yê Mezopotamya (MKGP) Ayşe Guneye qiseykerdişê xo de firsendê tarîxî arde vîr û wina va: “Tarîxî firsendê pîlî viraştî. Eke şima cewabê nînan nêdê, tarîx do şima tasfîye biko. Ganî waştişê şarî, waştişê yewîya neteweyîye bêra caardene. Ma amade yê û ganî pêro rojnamegerê kurdî goreyê nê prosesî têbigêrê.”
Ganî kurdî yewîya xo awan bikê
Hemşaredara Farqînî Naşîde Toprake vat ke her ca de vera destkewteyanê kurdan hêriş yeno kerdene û seba ke verê nê hêrişan bêrê girewtene ganî kurdî yewîya xo awan bikê.
Ma hînî azadîya xo yewbîyayîşê xo de vînenê
Aktîvîsta Tevgerê Cinîyanê Azadan (TJA) Ayşe Gokkane wiseykerdişê xo de veng daye cinîyanê kurdan û va: “Ma sey cinîyanê kurdan venga pêro kurdan danê ke ma hînî azadîya xo yewbîyayîşê xo de vînenê. Seba naye ganî pêro partîye, dezgeh û sazgehanê Kurdîstanî bibê yew.” AMED
