Siyasetmedarên kurd Sakîne Cansiz, Fîdan Dogan, Leyla Şaylemez, Sevê Demîr, Fatma Uyar û Pakîze Nayir, li Stenbolê bi merasîmekê hatin bibîranîn
Ji bo bîranîna 3 siyasetmedarên kurd Sakîne Cansiz, Fîdan Dogan û Leyla Şaylemez ku di 9’ê çileya sala 2013’an de li paytexta Fransayê Parîsê di encama sûîqestê de hatin qetilkirin û 3 jinên kurd Fatma Uyar, Sêvê Demîr û Pakîze Nayir ku di 6’ê çileya sala 2016’an de li Silopiyayê hatibûn qetilkirin, li avahiya HDP’a Stenbolê merasîma bîranînê hate lidarxistin.
Cihê bîranînê bi wêneyên siyasetmedarên jin û pankarta ‘Em bi ruhê berxwedana Sakîneyan û Sevêyan têkoşîna xwe didomînin’ hatibû xemilandin. Piştî deqeyek rêzgirtinê, di merasîmê de parlamentera HDP’ê ya Amedê Remziye Tosun axivî û wiha got: “Em ê heta dawiyê têkoşîna wan bidomînin. Divê hemû jin ji Sakîne Cansiz heta Sêvê Demîran, têkoşîna xwe xurtir bikin. Em soz didin wan ku em ê azadî û yekitiya xwe ava bikin. Ji bo vê em ê her tim têbikoşin.”
Piştî axaftina Tosun jî sînevîzyona ku serpêhatiya her 6 jinên têkoşer vedibêje hate pêşandan. Merasîma bîranînê bi dirûşma ‘Şehîd namirin’ bi dawî bû. STENBOL
