Mihemed Emer Evdilqadiro ke Almanya ra ame Sûrîye û tewrê çeteyanê DAIŞî bi vat ê birîndarê giranî yê DAIŞî bi ambûlansan berê sînorî ra bi fermî berdêne bi Tirkîya
Ebû Mihemed Almanî qey wayîrê Helfen in Notî û mesuldarê ci Bekîr Asturkî vat, têkilîya ê xeylî selahîyetdaranê dewlete û efseran dir esta û berê sînorî yê Cîlvegozuyî ra bê ke ambûlanse bisehnê şîyê Îdlib. Va: “Êlula 2019î de dimayo ke Almanya ra ame Îdlib, ez, Bekîr û şoforêko bîn o Alman ê bi nameyê Domînîkî ma 2 ambûlansî şirawitî Babo ke DAIŞ tede bi.”
Mihemed Almanîyo ke mabênê Tebqa û Til Ebyadî de 2015 de bi ambûlansan birîndarê giranî yê DAIŞî berdêne, va: “Gama ke ma birîndarî berdêne bi nêweşxaneyê Til Ebyadî, ma ambûlansa mi ra hewilnayêne ambûlansêna. Ber de înan esparê ambûlansêka bîne kerdêne û wina berdêne bi nêweşxaneyanê Tirkîya.”
Mihemed Emer Evdilqadiro ke zereyê DAIŞî de bi nameyê Ebû Mihemed Almanî yeno zanayene û destê HSDyî de yo, qalê hetê sazîyêka qelbî ya bi nameyê Helfet in Notî ke qaşo sazîyêka hetkarîya û îstîxbaratê Almanan û çapemenîya Almane nizd ra nas kenê, şirawitişê 2 ambûlansanê seba DAIŞî kerd. Evdilqadirî heman wextî de derheqê ronayoxê na sazîye Bekîr Asturkî, têkilîyê ê yê dewleta tirkî dir û senî birîndarê DAIŞî berdê bi nêweşxaneyanê Tirkîya de zî qisey kerd.
Mihemed Almanî Tunûs ray o û Almanya de ronişeno. Vano peynîya 2013î de yan zî destpêkê 2014î de ê organîzasyonê ‘hetkarîye’ ya bi nameyê ‘Helfet in Not’ ê Bekîr Asturkî, ke lîsteya cîhadîstan ê îstîxbaratê Almanan de yo, nas kerdo û tîya dest bi xebate kerda.
Vano dimayo ke ê sere nameyê ‘sazîya hetkarîye’ ya bi nameyê ‘Helfen in Notî’ de DAIŞijî berdê Bab, DAIŞijan hendî nêverdayo o ûca ra şiro. Almanî vano, Helfen in Not Almanya de bi, wayîrê ci Tirk bi, o seba ke hetkarîya merdimîye seba şarê Sûrîye bikero tewrê Helfen in Notî bîyo, gama ke şîyo verê înan înan ê ra vato ‘Ti eşkenê ma dir ambûlansan ravêrnê Sûrîye?’ ê zî qebûl kerdo.
Almanî dewam de vano menga 3 yan zî 4an a 2014î de bi waştişê wayîrê Helfet in Notî ‘Bekîr Abî’ şîyo Îdlib. Ambûlansî û ‘Bekîr’ cîya ameyê û o xo reyde berdo Stenbol. Ê zî ambûlansêk girewta û berê sînorî yê Cîlvegozu-Reyhanli ra ravêrtê bi Îdlibî.
Almanî heman wextî de hayîdarî dano ke lazimî bi Îdlib de şûbeyêkê Helfen in Notî estbî, dermanê ke înan vetêne rayîr ganî ravêrtêne. Derheqê wayîrê sazîya Helfet in Notî Almanîyî vat, têkilîyê ê bi Tirkîya ra zaf rind bî, mîyanê înan de efser, leşker û karmendê dewlete zî estbî û ê bi asanî ambûlansî Stenbol ra ravêrnayêne bi Îdlibî. Almanîyî derheqê ravêrtêşê beran de zî va: “Almanya ra heta Îdlib heme ewraqî fermî bî. Tirkîya de zî înan ambûlanse nêsehnayêne. Çunke xeylî nasê ê estbî. Naye ra tu problemêk nêvejîyayêne.”
Dozgerîya Kolnî tespît kerdo ke Helfet in Notî tewr tay 9 ambûlansî DAIŞî rê şirawitê.
Goreyê cigêrayîşê ANFyî Helfen in Noto ke bi fermî nê nameyî bikar nêano la xebatan keno, bajarê Neussî de bi nameyê ‘Kulturverein Weckhoven e.V.’ ‘hetkarî’ dano pêser. Bi heman hawayî sazîyêk bi nameyê ‘Al Yateem’ zî pabesteyê Kulturverein Weckhoven e.Vyî xebetêna. RÎMELAN
