Amed de Nobeta Demokrasîye roja 43ine de ya. Çalakîye de seba pêserameyîşê dormeyê xoverdayîşî veng ame dayene
Amed de Nobeta Demokrasîyî verba xespanê qeyûmî roja 43ine de dewam kena. Hemşaredarê Amedî Selçuk Mizrakli, parlementerê Partîya Demokratîke ya Şaran (HDP), 17 hemserekê şaredarîyanê ke Hemserekê Elîh û Hetkarî zî tede yê û endamê meclîsê şaredarîyan, endamê Meclîsî yê Dayîkanê Aştîye, Tevgerê Cinîyanê Azadan (TJA), rêxistinê gêncan û bi seyan kesî Cehdeyê Lîseyî de tewrê çalakîye bîyî. Çalakîye de sloganî ameyî vatene û çepikî ameyî pirodayene.
Hemserekê HDPyî yê Amedî Zeyat Ceylanî da zanayene ke heta ke qeyûmî şorê, do ê xo ver bidê. Zeyatî veng da şarî ke dormeyê xoverdayîşî de bêrê pêser. Ceylanî bale ante kampanyaya îmzaya ke hetê HDPyî ra ameye destpêkerdene û vat ke kampanya zaf eleqe vînena.
‘Ma do gamêk peyser nêerzê’
Hemşaredarê Colemêrgî Cîhan Kahramanî zî bi nameyê hemşaredaranê ke ameyî çalakîye qisey kerd û va: “Tarîxê xoverdayîşê kurdan de Şêx Seîd û Seyît Riza ra nata yew tradîsyonê xoverdayîşî esto. Nê tradîsyon qet gamêk peyser nêeşte û do nêerze. Ma nika meydanan de verba qeyûman xo ver danê. Qeyûmî do şorê.”
Parlementera HDPyî ya Amedî Salîha Aydenîze zî qiseykerdişê xo de wina va: “Xoverdayîşê ma verba polîtîkayanê hêrişî se serran ra dewam keno. Înan ke îradeyê ma rê qeyûmî tayîn kerdî, benê sebebê merdişê ma zî. Teyna pê wesayîtanê zirxinan bi desan merdimî merdî. Şarê Tirkî zî vejîyeno meydanan û bi nê hewayî paşt dano şarê kurdo ke têkoşînê seba pîyaciwîyayîşî dano.”
Badê qiseykerdişan çalakîya roniştişe dest pêkerde. AMED
