Şahoyî dîyar kerd ke şorişê Jin, Jîyan, Azadî bi taybetî wendegehan de xo raver beno, dewlete zî seba ke seba ke heyfê xo wendekaran ra bigîra, înan jehrîn kena.
Endamê Meclîsê PJAKî Amed Şaho beşdarê programê Radyo GEL bi û derheqê şorişê Jin Jîyan Azadî de qisey kerd û dîyar kerd ke 6 aşmî peynîya şorişî de mendê, dewlete bi hewayêkê kovîtî hêrîş kena.
Şahoyî da zanayene ke şîdet taybetîya dewletanê neteweyîyan a û nê çîyî vatî: “Dewleta Îran ê dewletan ra yew a ke, bi xebitnayîşê çekan, tepîştiş, remnayîş, cînayet, teror ûsn. taybetîyanê xo reyde yena zanayene. Hetê bînî ra zî bi şerê taybetî, bi hewayêko kovîtî hêrîşê şarî kena. Şar bi heme hêzê xo vera zimlê dewlete xover dano. Hewcedarîya dewlete bi şarî est a, yê şarî dewlete rê çin a. Dewleta Îran wazena şarê ser o hegemonyayayêk biviraza.
Dewlete Îran sereyê şorişî de seba ke bieşkîya şorişî bida vindarnayene, bi taybetî kesê ke serkêşîya şorişî kenê, înan rê zilm û zordarîye kerde. Waşt ke bi tersî şorişî bivindarna la lar şarî fam kerd ke, demokrasîyê înan binpayan bîyo û azadîya înan çin a. Nê çîyî xozaya însanan ra dûrî yê. Çîyo ke şorişgeran paweno û înan dano dewamkerdene xozaya înan a. Şorişo ke nika Rojhelat û Îran de beno, dewlete tersna û lerzna, coka dewlete kovîtî hêrîş kena.
Dewlete bi xo sey vurîsê kanserî bîya belayê şarî. Kamca de dewlete est biba uca de na nêweşî est a.Dewlete bi xo merg a. La cinîyî ciwîyayîş wazenê, wazenê ke biciwîyê. Dewlete îna terkê mergî kena, şarî rê ziwanê înan ra vêşêr yewna ziwan ferz kena. Kesê ke vera ney vindenê, dewleta Îran înan ra zaf aciz a. Na meselaya ewroyî nîya, meselaya 6 aşman nîya. Cêko ke na dewlete bîya îqtîdare, zilmê şarî kena. Nê çîyê ke ewro benê dewamê problemanê verênan ê.
Dewleta Îran heme heqan binpayan kena û serdestîya xo dewam kena. Îran de yew gandar zî bi ewle nêciwîyeno. Kes nêeşkeno xo sîyaset dewlete ra bipawo. La şar vera nê polîtîkayan sere nêroneno. Dewlete seba ke hegemonyaya xo bipawa her çîyî kena. No sîyaset tewr zaf zîndanan de yeno kerdene. Zîndanî uca seba şikitişê îradeyî û terbîyekerdişê şorişgeran o. La cêko ke têgêrayîşê Apoyî Rojhelat û Îran de vejîya meydan, zîndanî bîyê sembolê xoverdayîşê vera dewlete. Ferzad Kemanger û Şirîn Elemhuşî sey înan ke îradeyê înan sey asinî yo, darbêko giran da zîhnîyetê dewlete ro.
Şar wazeno xo bi xo xo îdare bikero, şar demokrasî wazeno. Şar wazeno ke no sîstemo merkezî êdî bibedilyo. Şar wazeno ke êdî zilm, bêkarîye, qirkerdiş, îdam û asîmîlasyon biqedîyo. Ma wazenê ke wa dewlete problemanê şarî çareser bikera.” BEHDÎNAN
