Kes ya zî kesê ke nînê zanayene kewtî Cemxaneyê Sultaneylîyî û ber û şibakanê cemxaneyî şikitî û erd ser de nuşteyê ‘Nêqedîya’ û ‘Bimirêne’ ame nuştene
Kes ya zî kesê ke nînê zanayene kewtî Cemxaneyê Komeleya Kulturê Pîr Sultan Abdalî (PSAKD) yê qezaya Sultaneylîyî yê Stenbolî û ber û şibakanê cemxaneyî şikitî. Kesê ke hêrişê cemxaneyî kerdî erd ser de nuşteyê ‘Nêqedîya’ û ‘Bimirêne’ ame nuştene.
Nê kesî eşyayanê cemxaneyî vila kerdî û pereyê ke qutîyê bexşîde bî dizînayî.
Serekê Cemxaneyê Sultaneylîyî yê PSAKDî Erdal Aksoyî derheqê hedîseyî de PÎRHA rê qisey kerd û wina va: “Xebatkarê cemxaneyî wexto ke serê sibayî ber akerdî, hedîse vînayî. Derheqê hedîse de cigêrayîşê ma dewam kenî.”
Erdan dewamê qiseykerdişê xo de va: “Bi şikitişê qutiyê bexşî, waştî ke hedîse sey dizî bidî nîşandayene. Labelê nuşteyanê ke ameyî nuştene de yeno vînayene ke hedîse hêriş o. Ganî elewîyî vera nê hêrişan de pîya têkoşîn bikerî û bibî yew. Ganî elewîyî arê bibî û yewîya xo awan bikerî. Eke bina nêro kerdene do nê hêrişî dewam bikerî.” STENBOL
