Şaristanê Strasbourgî yê Fransa de Yasemîne Çetîndag 23ê kanûne ra nata vînbîyaye bîye.Dima ke keyeyê ci muracatê polîsan kerd eşkera bi ke Yasemîne ameya qetilkerdene.
Babî Azad Çetîndago ke çewlîgij o vat: ”No mêrik û kênaya mi 8 serran ra nata pîya ciwîyayêne, 4 domanê înan estbî. La kênaya mi nê wextanê peyênan de hînî nêwaştêne pa ey biciwîya. 23ê kanûne de nê mêrikî verê çimanê domanan de dayo kênaya mi ro û dima zî xeniqanaya. Dima ey û embazêkê ci cenazaya kênaya mi daristan de kenê binê erdî. Ez nika Çewlîg de ya. La ma her roje kênaya xo de qisey kerdêne. Dima ke ma nêeşkayê xo biresnê aye ma kiştoxî rê telefon kerd la ey vato Yasemîne nêdîyo. Dima ma muracatê polîsan kerd. Torna min a pîle zî pîrika xo rê qala serebûtî kerda. Dima 28ê kanûne de polîsan cenazaya kênaya mi dîya.”
Polîsan eşkera kerd ke kiştox Ozyanik tepişîya û erşawîya zîndanî. Polîsan da zanayene ke keso ke hetkarîya Ozyanikî kerd qeçaxçî yo û 11 sûcan ra zaf reyî tepişîyayo. STRASBOURG
