Rêber Apo bi komployeke navdewletî radestî dewleta tirk a dagirker hat kirin, 25 sal in li girtîgeha Îmraliyê di bin tecrîdek giran de ye. Rêber Apo zêdetirî 3 sal in bi tu awayî agahî jê nayê girtin. Dewleta tirk a dagirker di kesayeta Rêber Apo mirovahiyê tecrîd dike. Ji bona wê gelê kurd bi berdewam dibêje ku azadiya Rêber Ocalan, fikrên wî û pirsgirêka kurd bi he ve girêdayîne û ji hev nayên qutkirin.
Çalakvanê siyasî Takor Zerdeşt derbarê girîngiya azadiya fîzîkî ya Rêber Ocalan a ji bo çareseriya doza gelê kurd de nerînê xwe anî ziman. Takor Zerdeşt behsa xiyanet û êrişên dagirkeriya dewleta tirk a li ser gelê Kurd kir û got: “Newroza îsal di rewşek hestiyar de derbas bû. Dijmin bi hemû hêza xwe gihiştiye asta hovîtiyê. Xeta xiyanetê jî bûye hevkarê dijmin. Sîstem û partî di lûtkeyê de xiyanetê dikin, bêy ku şerm ji dîroka kurdan bikin.”
Di dewamê Takor Zerdeşt anî ziman ku Rêber Apo 25 sal in di jêr tecrîdê de ye û wiha axivî: “Ger em hêza xwe ji bo azadiya Rêber Apo nekin yek, wê ev rewş sibe bibe şermezariyek mezin ji bo her kes û hemû kurdan. Divê ji beriya her tiştî pêngavên xwe ji bo azadiya Rêber Apo yek bixin.”
Di dirêjiya axaftina xwe de Takor Zerdeşt diyarkir: “Azadiya Rêber Apo, pirsa çareseriya doza gelê kurd û gelên Rojhilata Navîn bi he ve girêdaye û her tişt di kesayeta Rêber Apo de hatiye zindanîkirin. Ji ber wê bi azadiya Rêber Apo wê gelên Rojhilata Navîn jî azad bibin.”
Takor Zerdeşt di dawiyê de jî got: “Rêber Apo 30 hezar laperên dîroka nenivîsandî nivîsiye. Fikrên Rêber Apo ji bo azadiya gelan û baweriyek demokrat bi xwe vê rastiyê nîşan dide.”
