Dewleta tirk ji bo ku dexl û danê ku piştî dagirkirina Serêkaniyê û Girê Spî talan kiriye veguhezîne Rihayê, da ber îhaleyê. Hat zanîn ku îhaleya veguhestinê jî Şîrketa Neqliyê ya Oz-Duy a Navneteweyî wergirtî ye
Dewleta tirk di 9’ê cotmehê de tevî çeteyên xwe li dijî rojavayê Kurdistanê êrîşa qirkirin û dagirkeriyê da destpêkirin. Dewleta tirk û çeteyên wê li hêlekê bi sedan sivîl qetilkirin, li hêlekê bi anîna malbatên çeteyan û tirkmenên ji deverên cuda yên cîhanê demografyaya herêmê guhert û li hêla din jî mal û milkê li herêmê talan kir.
Yek ji berhemên ku dewleta tirk talan kir û di dize jî berhemên çandiniyê ne. Dewleta tirk ku li gel çeteyên xwe Serêkaniyê û Girê Spî dagir kir, dizîna hilberînên çandiniyê didomîne. Piştî destdanîn û talankirina zeytûnên Efrînê, dewleta tirk niha jî dixwaze dexl û danen li bajarê Girê Spî û Serêkaniyê bîne Tirkiyeyê.
Hat zanîn ku dewleta tirk ji bo ku dexl û danê li Serêkaniyê û Girê Spî bi dize, amadekariyan dike. Ji bo vê yekê jî ji bo veguhestina dexl û danê ku talan kirî, veguhestin daye ber îhaleyê.
Têkildarî mijarê li ser navê Şaxa Midûriyeta Navenda Rihayê (TMO), Platforma Elektronîk a Wergirtinên Cemaweriyê (KAP) ku girêdayî Saziya Îhaleyên Cemaweriyê ye agahî dan û destnîşan kir ku 20 tonên dexl û dan ê li Girê Spî dê veguhezînin Şaxa TMO’yê ya Rihayê.
Şîrketa Neqliyê ya Oz-Duy a Navneteweyî di îhaleya veguhestina dexl û dan de bi ser ket û dê vê îhaleyê bi milyonek û 300 hezar lîreyan bikişîne. Dê ev şîrket heta hezîrana 2020’an dexl û danên li herêmê veguhezîne Rihayê.
Hêjayî bibîrxistinê ye ku dewleta tirk piştî ku di sala 2018’an de Efrîn dagir kir, dest danîbû ser zeytûn û donê zeytê yên welatiyan. Ev zeytûn û donê zeytûnan veguhestibû Tirkiyeyê û hem di bazara navxweyî û hem jî di ya navneteweyî de weke malê xwe dabû nîşandan û firotibû. RIHA
