Wekîlê Partîya Demokratîke ya Şaran (HDP) yê Amedî Îmam Taçierî meclîs de gama ke kurdkî qisey kerdêne, qiseykerdişê ci hetê Serekwekîlê Grûba CHPyî Haydar Akarî ra ame astengkerdene. Taşçierî derheqê babete de ANFyî rê qisey kerd.
Taşçierî vist vîrî ke polîtîkaya asîmîlasyonî ya vera kurdan wextê ronayîşê komere ra bi hewayêkê sîstematîkî dewam kena û vat: “Qanûnê bingeyî yo faşîst ê 12ê Êlula 1982yî 19 rey bedilya. Rixmo ke sey boxçaya pînekerdîye bîyo derheqê ziwanê kurdan, statuyê kurdan û heq û azadîyanê kurdan de qet çîyêk nêbedilîya. Madeyê 42. yê qanûnê bingeyî de ziwanê kurdan eşkera yeno qedexekerdene. Madeyê 3. de zî vano kam ke Tirkîya de ciwîyeno tirk o.
Mi zî waşt ez pê ziwanê xo kurdkî yo ke ziwanê înan de qedexe yo qisey bikerî. Xora ez zana qedexe yo la waştişê mi wedaritişê qedexeyan o. La înan qiseykerdişê mi birna. CHPyî zî nêzdîbîyayîşê xo yê vera ziwan û heq û azadîyanê kurdan mojna. Heme welatanê dinya de zaf ziwna est ê. Seserrî yo wazenê pê îdam, zîndan, mergî kurdan asîmîle bikerê la ser nêkewtê. Ma do tim her platform de waştişê ziwan û statuyê kurdan bîyarî ziwan.”
Taşçierî bale ante qeyûman ser û vat: “Qeyûmê ke Kurdistan de ameyî tayînkerdene û xora nêzdîbîyayîşê dewlete yê vera kurdan fîneno çîman ver. Tirkîya de eke serekê/a şaredarî ceza bîgêro, meclîsî ra yew kewno herinda ey/aye la Kurdistan de wina nîyo.”
Îmam Taşçierî îfade kerd ke ziwanê dayîkê nasname û estbîyayîşê yew şarî yo û vat: “Ganî her ziwan bêro şuxulnayene û pawitene. Ma wina eşkenê kulturê xo yê pîrik û pîrkalanê xo bidê ciwîyayene. Mi mamosteyîya tirkî kerda la ez kurdkî dahîna rehet qisey kena. Qedexekerdişê ziwanî qetî nîno qebulkerdene. Xeylêk welatan de bi desan ziwanê fermî est ê. Çîyêkê meclîs de yenê qiseykerdene 30 mîlyon kesî fam nêkenê. Ganî kurdî hinda wayîrê statuyî bê. Heta ke kurdî herra xo de xo îdare mekerê do tim raştê caardişanê winayênan bêrê. AKP 20 serrî yo îqtîdar de yo la hema semedê ziwan û nasnameyê kurdan çîyêk nêkerdo.” ANQARA
