Li Qoser a Mêrdînê bi tevlêbûna parlamenter û hevşaredaran re ji bo şermezarkirina tayînkirina qeyûm a li ser Şaredariya Qoserê çalakî hat lidarxistin. Di çalakiyê de hat gotin ku tayînkirina karmendekî ya li şûna hilbijartiyan, rewa nîne
Çalakiyên li dijî biryara tayînkirina qeyûm a li ser Şaredariya Qoser a Mêrdînê berdewam dikin. Bi vê boneyê îro jî bi tevlêbûna parlamentera Partiya Demokratîk a Gelan (HDP) a Mêrdînê Ebrû Gunay, hevşaredar Nilûfer Elîk Yilmaz û welatiyan li Qada Azadiyê ya Qoserê çalakî hat lidarxistin.
Qada çalakiyê ji hêla polîsan ve hate dorpêçkirin. Polîsan biryara ‘qedexeya çalakiyan’ a walîtiya Mêrdînê nîşan dan û destûr nedan ku daxuyanî bê dayîn. Li ser vê yekê jî daxuyanî li ber Avahiya HDP’ê ya Qoserê hate dayîn.
Di çalakiyê de parlamenterê Ebrû Gunay axivî û bertek nîşanî biryara waliyê Mêrdînê Mûstafa Yaman ku di heman demê de qeyûmê Şaredariya Bajarê Mezin a Mêrdînê ye da. Gunay got ku hewl didin dengê heqîqetê bitepisînin û wiha bi dawî kir: “Dixwazin rastiyan veşêrin. Lê çiqas êrîş bikin jî em ê li ser pêya bin û têbikoşîn. Tayînkirina karmendekî ya li şûna hilbijartiyan rewa nîne.” MÊRDÎN
