Senetorê awûstûralyayî Rîchard Dî Natele ji bo Leyla Guven û çalakvanên din ên ji bo rakirina tecrîda girankirî ya li ser Ocalan di greva birçîbûnê de ne, pêşnûmeyek da Parlementoya Awûstûralyayê
Senetorê Awûtûralyayê Rîchard Dî Natele têkildarî çalakiya greva birçîbûnê ya bêdem û bêdorveger ku hevseroka Kongreya Civaka Demokratîk (KCD) û Parlementera HDP’ê ya Colemêrgê Leyla Guven û çalakvanên din ji bo rakirina tecrîda girankirî ya li ser Rêberê Gelê Kurd Abdullah Ocalan daye destpêkirin, pêşnûmeyek pêşkêşî Parlementoya Awûstûralyayê kir.
Rîchard Dî Natele di pêşnûmeya xwe de bal kişand ser greva birçîbûnê ya Guven ku 100 roj li pey xwe hiştiye. Dî Natele destnîşan kir ku nêzî 300 çalakvanên din jî di grevê de ne û bibîr xist ku Tirkiye bi qasî pêwîst ne av û ne jî vîtamînan dide girtiyên di grevê de ne. Dî Natele di pêşnûmeya xwe de bang li hikûmeta Awûstûralyayê kir ku ji bo diyalogeke di navbera Tirkiye û çalakvanan de bê çêkirin, bikeve nava hewldanan.
Hate ragihandin ku dê pêşnûme di meha nîsanê de li meclisê bê nîqaşkirin.
