Walîtiya Qersê duh ‘qedexeya çalakî û şahiyan’ a ji bo 15 rojan ragihandibû. Piştî vê biryarê derketin û têketinên bajêr hemû ji aliyê polîsan ve hat girtin. Hevseroka HDP’ê Pervîn Bûldan û şandeya li gel wê îro li Qersê serdanan pêk tînin. HDP’yî dibêjin ku ji bo bernameya wan li bajêr ev biryar hatiye derxistin. Kesên ji derveyî bajêr ku dixwazin biçin navenda Qersê beşdarî bernameya HDP’ê bibin tên astengkirin û polîsan wek hîncet jî biryara walîtiyê nîşan didin. Hevşaredara Êlihê Songul Korkmaz a qeyûm tayînî şûna wê hatiye kirin xwest biçe Qersê beşdarî bernameya partiya xwe bibe lê polîsan ew di têketina bajêr de bi saetan sekinand. Korkmaz bertek nîşanî rewşê da û got ku ev astengkirina azadiya seyahatê ye.
Ev yekem car e Walîtiya Qersê biryara ‘qedexekirina çalakî û şahiyan’ li bajêr digire. Balkêş e ku beriya bernameya Pervîn Bûldan a li Qersê biryarek wiha hat derxistin. QERS
