Li Girtîgeha Tîpa T a Şirnexê derbarê 3 jinên girtî ku ji 15’ê adarê ve li dijî tecrîdê di greva birçîbûnê de ne, lêpirsîn hat vekirin
Çalakiyên greva birçîbûnê ya bêdem û bêdorveger ku bi pêşengiya hevseroka KCD’ê Leyla Guven li dijî tecrîdkirina li ser Rêberê Gelê Kurd Abdullah Ocalan hatine destpêkirin didomin. Roja ku grev li girtîgehên bakurê Kurdistanê û Tirkiyeyê hatine destpêkirin zextên li ser girtiyan jî hatiye zêdekirin.
Hat ragihandin ku li Girtîgeha Tîpa T a Şirnexê têkildarê 3 jinên girtî yên ketine grevê lêpirsîn hatiye destpêkirin. Hat diyarkirin ku ji ber girtiyên ji 15’ê adarê de di greva birçîbûnê de ne û ji aliyê girtîgehê ve ji wan re psîkolog hatiye şandin, wan jî psîkolog qebûl nekiriye û gotine ‘Em ne nexweş in di çalakiyê de ne’ lêpirsîn hatiye vekirin. Mudurê girtîgehê lêpirsîna ku hatiye vekirin bi parlamenterên HDP’ê yên ku pê re hevdîtin kirin re jî parve kir.
Rêveberiya girtîgehê got ku dê lîjne dîsa bicive û lêpirsîna hatiye vekirin careke din li ber çavan were derbaskirin.
Her wiha li heman girtîgehê de tevî çalakgerên jin bi giştî 20 girtî li dijî tecrîdê di çalakiya greva birçîbûnê de ne. ŞIRNEX
