Do festîvala emserî ya Kultur û Xoza ya Dêrsimî de hemverê hêrişanê serê kultur, ziwan, xoza û bawerîye de reaksîyonî berî nîşandayene û do nameyê ‘Dêrsimî’ rê wayîr bêro vetene
Festîvala Kultur û Xoza ya Mûnzûrî ya 19ine do emser mabênê 25-28ê Temmuze de bêro viraştena. Amadekarîyê seba festîvale tay mendê ke biqedîyê. Komîteya Amadekar a Festîvale seba festîvale muracatê Walîtîya Dêrsimî kerd.
Par walîtîye bi bahaneya ‘propagandaya organîzasyonî ya’ festîvale qedexe kerdebî û emser yeno meraqkerdene tirêm do seba muracato ke ameyo kerdene se vajo. Heman wextî de do temaya festîvala emserî texrîbatê hemverê tarîx û kulturî bê û do slogana ci zî ‘Dêrsim, bawerî, ziwan û kulturê ci rê wayîr vejî. Biciwîye û bide ciwînayene’ bo.
25ê Temmuze de do sere de Meydanê Seyîd Rizayî de eşkerayîyêk bêro dayene û dimayê tafînayîşê çirayan do festîvale dest pê bikero. Do festîvale de çalakî û konserê tewir bi tewirî bêrê viraştene û do heta 28’ê Temmuze dewam bikero.
Endamê Komîteya Amadekare ya Festîvala Kultur û Xoza ya Dêrsimî Alî Haydar Benî vat ke reya ewilêne festîval serra 1999 de ameyo waştene ke hemverê vêşnayîş û vengkerdişê dewan de bêro viraştene, la a game ameyo qedexekerdene. Benî ard ziwan ke naye ra festîvale reya ewilêne serra 2000î de ameya viraştene û festîvale hemverê vengkerdişê dewan, viraştişê awbendan, santralanê hîdroelektrîkan û madenan de tewirêko muhîm ramoto û va: “Hendî festîvale de ziwan, bawerî û kulturê cîyayî zî estê. Emser temaya sereke ya festîvale kultur, ziwan, bawerî û nameyê ‘Dêrsimî’ yo. Nameyê Dêrsimî qebûl nêkenê. Ma do festîvala emserî de reyna nameyê Dêrsimî rê wayîr vejîyê.”
Benî tewr peynî de vat ke eleqeyêko zêde seba festîvale esto û ê umîd kenê ke tewrbîyayîşêko pîl bibo û veng da her kesî ke tewrê festîvale bibê û nameyê Dêrsimî rê wayîr vejîyê. DÊRSIM
