Parlamentera HDP’ê Tayîp Temel ê bi daxwaza rakirina tecrîdê di greva birçîbûnê de ye têkildarî rojiya mirinê wiha got: “Li hemberî bedenek ku dihele ne îktîdar ne jî muxalefet wê dikaribe li cihê xwe bisekine. Rewşenbîr, hunermend û siyasetmedar dê ji ber berpirsiyariya wîjdanê cihek ku birevinê nikaribin bibînin.”
Parlamenterê HDP’ê yê Wanê Tayîp Temel ê ji 8’ê adarê ve bi daxwaza rakirina tecrîdkirina Rêberê Gelê Kurd Abdullah Ocalan li avahiya HDP’ê ya Amedê di çalakiya greva birçîbûnê de ye. Temel têkildarî rojiya mirinê ya 15 girtiyan li ser hesabê yê medya civakî Twîtterê daxuyanî da.
Temel di parvekirina twîtterê de bêdengiya hikumetê û raya giştî rexne kir û wiha got: “Ne roj êdî saet 15 kesan nêzî mirinê dikin… Sawa herî zêde ya mirinê dide mirov mirina bi birçîbûnê ye. Heta ji bedeldayîna wan girtiyan neyê fêmkirin, dê tu pirsgirêkên li vî welatî neyên çareserkirin. Li hember bedenek ku bi saw dihele ne îktîdar ne jî muxalefet wê dikaribe li cihê xwe bisekine. Rewşenbîr, hunermend û siyasetmedar dê ji reva berpirsiyariya wîjdanî nikaribin cih bibînin.” AMED
