Seke yeno zanayene 14ê Gulane de Tirkîya de weçînayîş bêro kerdene û şar do şêro qindoqan ser û raye bido. Pêro partîyê sîyasî hadrekarîya weçînayîşî kenî û hewl danê ke hêzê xo yew bikerî ke nê îqtîdarî bişirawî serê eşteyê tarîxî.
Derheqê babete de Hetkarê Hemserekanê Partîya Demokratîke ya Şaran (HDP) Tayîp Temelî ANFyî rê qisey kerd û bale ant prosesê weçînayîşî ser.
Temelî vat: ”Partîya ma pê gamanê ke erzena eşkena verê sîyasetî welatî bibedilno. Coka çimî serê ma de yê. Ma zî berpirsîyarîya xo anê ca û goreyê menfeatê şarê xo têgêrenê. Ma êlula 2021î de deklarasyonê xo eşkera kerdbi ke no semedê çarserkerdişê problemanê welatî vengdayîşêk bi. Ma nika zî goreyê nê deklarasyonî gaman erzenê. Pêvînayîşan de ma dî ke ma Kiliçdaroglu reyde waştişanê ma yê sey çareserkerdişê meseleya kurdan, qedînayîşê qeyûman, xoserîya hukmî de pê kenê. Xora kam ke demokrasî û azadîye wazeno nêeşkeno vera nînan vejîyo.
Bi yew lîste dekewtişê weçînayîşî qerarêko raşt bi. La TÎP û EMEP ê ke mîyanê Îtîfaqê Kede û Azadîye de ca genê waşt binê serbanê îtîfaqî de bi logayanê xo tewrê weçînayîşî bibê. Rixmo ke ma kombîyayîşan de muzakereyê dergî kerdî, wina netîce vejîya. Bêşik zehmetîyê nê est î. Ma sey îtîfaqî yew bajar de wekîl vejê zî seba ke nê reyî hîrê partîyan rê vila benê, beno ke ma wekîl mevejê zî. Seba ke ma bi yew lîste denêkewtî beno ke tay bajaran rixmo ke ma eşkenê wekîl vejê, beno ke ma mevejê.
Seba ke ma rîskan wedarê, ma heme tedbîranê xo genê. Wa şarê ma qesawet mekero, rehet bo. Çîyo ke do bêro kerdene rehet o. Çîyo ke gerek hemwelatîyê ma bikerê, her ca de wa morê xo yê ‘Ya’ bibê binê logoyê Partîya Çepe ya Keskan ro. Cayo ke dara morê yê Partîya Çepe ya Keskan vînenê wa cadê morê xo bidê piro. Partîya Çepe ya Keskan nê weçînayîşê muhîmî de sey temsîlkarê bindestan, karkeran, kedkaran gerek tew hêzdar meclîs de cayê xo bîgêro.
Nê weçînayîşî de di rayîrî est ê. Ya ma vanê faşîzmî rê bes o, ya zî faşîzm dahîna beno xurt û komel bênefes maneno. Yewna rayîr çîn o. Ma verê xo da yo demokrasî û azadîye. Mesele wina zelal a. Coka gerek her kes berpirsîyarîya xo bîyaro ca, wayîrê reya xo vejîyo. Eke Partîya Çepe ya Keskan 100 ya zî dahîna zaf wekîlan vejo no semedê pawitişê komelî temînat o.
Îqtîdarê AKP-MHPyî semedê serkewtişî do heme kay û xîleyanê xo bifîno dewre. Coka asayîşê sandiqan zaf muhîm o. Seba ke reyê ma medizîyê ma amadekarîye kenê. Heta ke ma eşkenê wazenê namzedan mîyanê şarî ra biweçînî ke îradeyê şarî temsîl bikerê. Ma bi coş û heyacanê amadekarîye kenê. Rixmê heme zextan ma tîya de yê û mesajê ma do pêro pîya bibedilnê danê. Ma do miheqeq ser bikewê.”
