Hemserekê HDPyî Sezaî Temellîyî vera tecrîdê serê Rayberê Şarê Kurdî Abdullah Ocalanî reaksîyon da û va: “Çareserîye ya pêro problemanê sîyasîyan Îmralî de ya.”
Kampanyaya weçînayîşê 31ê Adare ya HDPyî dewam kena. Kampanya 1ê Adare de bi hawayê fermîyî destpêkerd û hem Kurdîstan hem zî Tirkîya de bi moral û kelecanîya pîle yena domnayene. Hemserekê HDPyî Pervîn Buldane û Sezaî Temellîyî her roje yew bajar de beşdarê programan benê û şaran de yenê têhet. Temellîyî qisey kerd û hêrişê Serekê AKPyî Erdoganî yê vera HDPyî, nêzdîbîyayîşê weçînîtoxan, tecrîd û grevê vêşanîye ercnayî.
Temellîyî va Kurdî bi qerardarî û îradeyê pêtî têgêrenê û her çiqas ke bêveng biasê zî ma mîtîng û programan de vînenê ke hêrsêko pîl esto û çalakîyan de no hêrs beno eşkera. Temellîyî wina va: “Na kelecanîya şarî hêvî dana ma. Şar do na qerardarîya xo sandoqan de bimusno. Wa şikê kesî bi nê çin bo. Ma do netîceyêko baş bigîrê. Çunke yew lînc o sîyasî yo ke bi destê qeyûman, bi destê qaymeqam, walî û hêzê ewlehîye ke sey teşkîlatê AKPyî xebetînê yeno kerdene, dewam keno. Ma hawayêko winasîyî de kampanyaya weçînayîşî kenê. Vera nê hawayê negatîfî, şarê ma bi kelecanî, ma rê wayîr vejîyeno û no zî hêz dano ma. Nê pêro seba ke ma şaredarîyan peyser bigîrê nênê kerdenê. Ma wazenê ke welat de mucadeleyê demokrasî û haştîye bibo berz. Ewro no welat de, seba ke tecrîd bêro şikitene û polîtîkayê şerî biqedîyê weçînayîş yeno kerdene. Yanê ma tena seba îdareyê şaredarîyan nêşonê weçînayîş. Ma şarê xo û teşkîlatanê xo reyde, yew etabê mucadeleyî de vaz danê û serkêşê nê etabî zî Leyla Guvene û xoverdayoxê grevê vêşanîye yê bînî yê. Ma zî kenê ke biresê Leyla Guvene û xoverdayoxanê bînan.
Ma tim Îmralî îşaret kerd
Her cayanê Tirkîya de bêedaletîyî estê. Edaletî salonê mahkemeyan terk kerdo. Naye ra zî mucadeleyê vera tecrîdî, eslê xo de mucadeleyê edaletî yo. Nê 4 serranê peyênan de ke merdim biewno, vîneno ke na rêzîlaya bêedaletîye kamca ra yena. Coka ma seba ke Tirkîya nêro tecrîdkerdene, vera rejîmê otorîter û faşîstî nêşoro, tim Îmralî îşaret kerd. Tirkîya de xeylî hetan bi taybetî zî Rojawanî no fehm nêkerdo. Vanê ‘şima çira tim tecrîdî qisey kenê û Îmralîyî îşaret kenê?‘ Sosyalîst û çepgêrê Rojawanî derheqê mesele de wina vanê û nêzdîbîyayîşê ci wina yo. Beno ke Leyla Guvene seba naye îtîraz kerdo. Yanê seba ke fehm nêkenê reaksîyon dayo.
Vengdayîş ê seba wedaritişê tecrîdî
No welat de problemê Kurdan esto. No problem problemê ewroyî nîyo. Tarîx ra nata esto. Her kesî, seba ke no problem çareser bibo, pêşnîyazî kerdê. Îqtîdar û îdarekaranê verênan no problem bi mantiqê ewlehîye nirxnayo û çareser nêkerdo. Problem mabên de, eşkera vinderte yo. Wina ke şoro, qet yew problemê Tirkîya do çareser nêbo. Derheqê nê problemî de çareserîya tewr rastikene, hetê Îmralîyî ra ameya pêşnîyazkerdene. Dewlete zî bawerîya xo pê arda û masaye de nîşta ro û nê prosesî 2 serrî dewam kerd. Ma dest de doneyê winasîyî estê. Kesî ê 2 serrî xo vîrî ra nêkerdê. Ma zî nê doneyan îşaret kenê û wazenê ke wa tecrîd bêro wedaritene. Çunke na mesela de yew muxatab esto. Dewlete nê muxatabî de 2 serrî nîşta ro. Ma zî sey yew partîya sîyasîye wazenê şar însîyatîf bigîro û seba çareserîya problemî rol bigîro. Talebê wedaritişê tecrîdî, talebê meşru û hiqûqîyî yê.
Problemê kurdan, çimeyê pêro probleman o
Şima ke nê taleban nêvînenê, o wext şima nêwazenê problemê Kurdan çareser bikê û na bêçareserîye ra kare kenê. Na bêçareserîye şima rê yew îqtîdar dayo viraştene. No îqtîdar çar serranê peyênan de bi şer, bi şîdet, bî bêedaletî, bi bêhîqûqîye têgêrayo û bêusûlîye kerda peyda. Krîzî vejîyê meydan. Sûrîye de bêçareserîye sereyê xo girewto û şiya. Ewro Tirkîya de nêzdîyê 4 mîlyonî Sûrîyeyijî estê. Senî ke Kurdan rê kenê, vera Sûrîyeyijan zî netewperestîye yena kerdene. Sebebê bêçareserîya Sûrîye, problemê Kurdan o. Her tim Rojawanî, Minbiçî hedef musnenê yan zî çîyê ke ma Efrîn de dîyî… Wexto ke ma derheqê Efrînî de qisey kerdêne, reaksîyon dayêne ma. La ewro halê Efrînî eşkera yo. Çepgêr û sosyalîstî zî derheqê Efrînî de bêveng mendî. La ewro eşkera aseno ke tena seba Efrînijan nê, seba Tirkîya zî no problemo zaf pîl o. Tecrîd coka nuqteya zaf krîtîke de vindeno. Coka problemê Kurdan, çimeyê pêro probleman o.
Destê AKPyî de qet çiyêk nêmendo
Tîya de çiyo tewr krîtîk, dişmenîya ke Kurdan yena kerdene yo. Îqtîdar bi saya dişmenîya Kurdan reyanê netewperestan anceno xo het û keno ke bi polîtîkayanê şerî payan ser o vindero. Pêro weçînayîşanê peyênan de wina kerd. Çunke dest de çiyêko bîn nêmendo. Ewro mesela ameya heta ’Kurdî def bê û şorê‘ û no nêzdîbîyayîş zaf bi xeter o. Ewro Kurdan keno sûcdar, la Kurdî tena Colemêrg de ciwîyenê qey? Bajarê Kurdan ê tewr pîlî Sitenbol, Enqere, Aydin, Îzmîr, Antalya û Manîsa yê. Şima nê cayan de şaran yewbînan rê kenê dişmen û verdanê pê. Îqtîdar keno parçe. Yanê seba ke şarî bîyaro têhet, qet çiyêk nêkeno û hêzê ci yo winasî zî nêmendo xora.
Êdî her kes Erdoganî ra aciz bîyo
Yew Serekkomar 20 mîlyon merdimî ra senî vano ‘def bê şorê‘? Nê welatî xeylî serekkomarî dîyî û qet yewî na mesela çareser nêkerde. Pêroyînan eynî xetayî kerdî. Pêroyînan teda û zulim kerd. La qet yewî nêvat ‘def bê şorê‘. Nînan êdî aqil pernayo. No karê aqilî nîyo. No îqtîdar êdî nêeşkeno sîyaset bikero. Êdî her kes bîyo aciz. Serekkomar yew roje de tewr tay 4 dolimî vejîno ekranan ser. Her qiseykerdişê xo sey weşanê ganîyî yeno weşanayene. Her deqa keweno keyeyanê şarî û wazeno ke bi ferasetê xo yê şaşî mezgê merdiman bixerepno. La kes temaşe nêkeno.
Kurdî reyanê xo nêdê AKPyî
Merdimî nê heqaretan ra zaf bîyê acizî. Handê hêrişê ma keno, la şoro biewno hela namzedê xo bi kamcî ziwanî qiseykenê. Namzedê AKPyî yê Wanî bi ziwanê Çînî qisey kenê qey? Bêgûman Kurdkî qisey kenê. Qeyûmê Amedî zî Kurdkî qisey keno. Çunke nê bajaran de Kurdî estê. Yew Kurd, Kurdê bînî de helbet bi ziwanê xo qisey keno. Êdî faydeyê ê bi Tirkan zî çin o. Hurmet nêmusneno Tirkan û weçînitoxanê xo. Tirkî zî no welat de ciwîyenê û yew îradeyê înan zî esto. Bi nameyê îradeyê Tirkan, hêrişê Kurdan keno. Tirkî çiyê winasîyî qebul nêkenê. Naye ra zî ganî Tirkî îtîraz bikerê. Kurdî xora kenê.
Ma demokrasîyî pawenê
No weçînayîş de, goreyê weçînayîşê 24ê Hezîrane, hîna zêde reyan bikero vîndî. Çunke eynî rayîrê xeletî ra şono. Hetê sîyasetî ra, êdî çiyo ke bido Tirkîya nêmendo. Ma demokrasî, haştîye, laîkîye pawenê û rayîrê komarê demokratîkî akenê. Ma dewleta hiqûqî û hemsencîya hêzan esas girewte. Ma bêhetîya çapemenîye pawite. La înan se kerd? Ê teda, gefî û tersî ra dot çîyêk nêkerd vila û nêpawit. Ma ra wet kes seba şaran, seba kedkaran, seba cinîyan qet yew çi nêkeno. Naye ra zî sandoqe de tena yew tercîh esto û o tercîho rast zî HDPyo. HDP hêvî yo, ameye yo, haştîye yo û demokrasî yo. AMED
