Sezaî Temellî hemşaredaran reyde ame têhet û va: “Fikrê ma ‘Demokrasîya radîkal’ o. Ferasetê ma yê demokrasîyê radîkalî do Komara Demokratîke biafernayo. Cayo ke no do bêro awankerdene herême ma yê.”
Hemserekê Şaredarîyan ê HDPyî serekatîya Hemserekê Pêroyî Sezaî Temellî reyde Amed de ameyî têhet. Kombîyayîşî de netîceyê weçînayîşî ameyî ercnayene û stratejîyê demê ameyoxî yê îdarekerdişê cayîyan ame munaqeşekerdene.
Parlamenterê HDPyî yê Dêrsimî Alîcan Onlu destpêkerdişê kombîyayîşî de qisey kerd û hemşaredarê ke ameyê weçînayene pîroz kerdî. Onlu bale ante serê tecrîdkerdişê Rayberê Şarê Kurdî Abdullah Ocalanî û vat, “Tecrîd her wareyê cuye de esto. Ameyoxê şarê Tirkîya tecrîdkerde yo. Lingê bingeyênî yê tecrîdî zî Îmraliyî de yê. Şarê Tirkîya ganî vernî de tecrîdî Îmraliyî werte ra wedarnayo. Serkêşîya wedartnayişê tecîrî Leyla Guvene kena. Hemra Leyla û bi hezaran hemrayê bînî xo ver ro danê. Ma nê xoverdayîşê înan bi rêzdarî silam kenê.”
Di zîhnîyetî ameyê hemberê yewbînî
Hemserekê Pêroyî yê HDPyî Sezaî Temellî zî Leyla Guvene û şexsê aye de bi hezaran xoverdayoxê grevê vêşanîye bi rêzdarî silam kerdî.
Temellî weçînayîşê cayîyan ercnayî û va: “Tirkîya de di kampanyayî ameyî rayraberdene. 31ê Adare ma pîya di kampanyayî temaşê kerdî. Labelê wexto ke merdim perspektîfêke tarîxkî ra rewşe de nîyabido, yeno dîyene ke di zîhnîyetî ameyê hemberê yewbînî. 5ê Nîsana 2015î ra nata tecrîdêko mutleq Tirkîya de esto, ke no zî bi nêqebûlkerdişê mutabaqatê Dolmabahçeyî dest pêkerd.”
Krîz girantir beno
Temellî ard ziwan ke, îqtîdar mabênê 4 serran de tecrîdê mutleqî reyde polîtîkayê şerî kerdê xo ver û çimeyê welatî seba nê şerî xêrc kerdî û vat, Tirkîya mabênê nê 4 serranê peyênan de kewta mîyanê krîzî û krîz zî her ke şino girantir beno.
Temellî va:”Ma nêpawenê ke îqtîdar wextêko kilm de fek na xuya xo ra raverdo, labelê ganî sazgehê Qanunê Bingeyînî goreyê qanûnan têgêrayîş bikerê.”
Şarê Kurdî berpirsîyarîya xo arde ca
Temellî bale ant serê stratejîyê înan ê wextê weçînayîşî û va: “Ma no stratejîyê xo bi hawayêko serkewte ard ca. Ma kesan ê ke nê prosesî de ca girewto rê sipas kenê, bi taybetî şarê Kurdî rê sipas kenê. Şarê Kurdî seba bicaardişê nê stratejî berpirsîyarîya xo her ca de arde ca. No stratejî gamêka xurte bîye seba destpêkerdişê prosesê demokratîkî. Tedeyîyêkê demokrasî ameyê afernayene. Vengdayîşê merdiman kerd ke rayan, îrade û ameyoxê xo ra wayîrê bivejîyê.”
Ferasetê ma yê demokrasîya radîkalî do komara Demokratîke biaferno
Temellî va: “Ma wayîrê fikrê ‘demokrasîyo radîkal’ ê. Demokrasîyo radîkal bale anceno serê xurtbîyayîşê demokrasîyê cayîyan. Demokrasîya radîkal wayîrê linganê. A yewine têkoşînê cinîyan o. Ferasetê temsîlîyetê têduştîye her wareyî yo. Ferasetêkê têduştîye yo. A dîyine; ked a.No nêzdîbîyayîşê ma yê sinifkî yo. Seba ke warayanê cayîyan de cewab keda cimatî rê bêro dayene, her beşê cimatî na xete ser o eşkenê bêrê têhet. No ferasetêk eynî wextê seba xozayî zî muhîm o. AMED
