Hemserekê Pêroyî yê HDPyî Sezaî Temellî bajarojê Saricanî yê qezaya Depî yê Xarpêtî de xitabê şar kerd û hêrişê hemverê awanîya HDPyî yê Amedî şermizar kerd. Temellî derheqê sereştişê awanîya HDPyî de va: “Sereştişê awanîya ma teşhîrkerdişê bêhuqûqîyê Tirkîye yo. Ma do 31ê Adare de pîya peynîya zilmî bîyarî.”
Hemserekê Partîya Demokratîke ya Şaran (HDP) Sezaî Temellî, çarçewaya programê weçînayîşî de şî Xarpêt û şarê bajarojê Saricanî yê qezaya Depî yê Xarpêtî reyde ame têhet. Temellî bi coşêk gird ame pêşwazîkerdiş. Temellî dima ra tewrê heyetî derbazê buroyê weçînitişî bî û ewja de bi def û zirneyan ame pêşwazîkerdiş. Koma ke arê bîye verê def û zirneyan de govendan girewte. Temellî buroyê weçînitişî de qiseykerdişêk kerd û hêrişê hemverê awanîya HDPyî yê Amedî şermizar kerd.
Sere de namzedê hemserekîya Şaredarîye Saricanê Bekir Polat û Canan Tagtekine şar silam kerdî.
Temellî qiseykerdişê xo de da zanayene ke îqtîdarê AKPyî bi hêrişanê serê şarê kurdî û HDPyî bîyayîşê xo paweno û va: “Îqtîdarê AKPyî ke çîyêk destê ci de nêmendo hêrişê şarê kurdî û partîya kurdan keno. Vizêr eştî serê awanîya partîya ma ya Amedî. Qet nêşermayenî qala huqûqî kenî. Merdiman derb kerdî. Ma tarîx ra nata zilmê îqtîdaran vînenî. Labelê ma heta nika zilmêko winasî nêdî. Vanê zerre de sucdar estî. Labelê esasê xo de sucdar teberde yî. Wa kesêk meraq nêkero. Do hesabê nê sucan bêro perskerdiş. Edalet do pê bêro. 31ê Adare de do peynîya zilmî bêro. Bêrêne ma pîya hemverê nê zilmî de vengê xo berz bikerî.”
Temellî tewr peynî hêrişê vizêrin yê Stenbolî yê hemverê Rayîrşîyayîşê Şewe yê Femînîstan şermizar kerd û dîyar kerd ke prosesê AKPyî de bi hezaran cinîyî ameyî qetilkerdiş. Temelî ard ziwan ke zîhnîyetê camêrd û serdestan prosesê AKPyî de zêdîyayo. XARPÊT
