Temellîyî programê HDPyî yê Çewlîgî de bale ante ‘problemê bekayî’ ser û va: “Seba ke problemê bêkarîye û enflasyonî de bîyo aciz, vejîyeno vano problemê bekayî esto.”
Hemserekê HDPyî Sezaî Temellî, çarçewaya programê weçînayîşî de şî Çewlîg şarê Çewlîgî de ame têhet. Hemserekê DBPyî Mehmet Aslan zî Temellîyî reyde beşdarê programî bi. Temellî û Aslanî pîya, Bedlîs ra dima derbazê Çewlîgî bîyî û qezaya Kanîreşe de, şîyî serdayana keyeyê yew endamê partiye yo ke merdo. Temellî, Aslan û şarî ra bi desan kesî, serdayene ra dima, goşdarîya hawayê serdî nêkerd û bajar de gêrayî, esnafî ziyaret kerdî.
Temellî û Aslan, Kanîreşe ra dima derbazê Çewlîgî bîyî û çatê rayîrê Bongilanî de hetê konvoyê HDPyîjan ê pîlî ra ameyî peşwazîkerdene. Konvoy heta ke rest verê buroyê weçînayîşî yê Meydanê Beşyolî yê HDPyî her ke şî bî derg. Herçiqas ke dormeyê Meydanê Beşyolî hetê polîsan ra bêro girewtene zî, bi hezaran kesî ameyî pêser.
Hereketê Azadîyî ra Ayetullah Aşitî zî beşdarê programî bi û qendîla şarê Çewlîgî pîroz kerde. Aşitîyî qiseykerdişê xo de bale ante muhîmîya yewbîyayena Kurdan ser û va ganî şar îtîfaqê Kurdan bikero pêt û serkewtişê Kurdan esas bigîro.
Hemserekê DBP’yî Mehmet Aslan, bi slogananê şarî reyde qiseykerdişêk kerd. Aslanî silamê Leyla Guvene resna şarê Çewlîgî û wina va: “Ez kes û şarê ke vera faşîzmê AKPyî xo ver danê silam kena. Ma bi serran o ke nê erdî ser, seba ke bi kultur, nasname û ziwanê xo biciwîyê mucadele kenê û bedelan danê. Kesê ke nêwazenê Kurdî bi nasnameyê xo biciwîyê, zulim kenê. La ma do dersa înan bidê ci. Seba ke tecrîd bêro şikitene grevê vêşanîye dewam kenê. Ganî ma zî paştdarîye bidê nê çalakîyan û nê barî tena dêmmadê paştîya girewteyanê sîyasîyan ser.”
Aslanî ra dima namzedê hemserekîya Şaredarîya Çewlîgî Hişyar Ozsoyî û Senem Çakase şar silam kerd. Çakase bi slogananê, ‘cinî, cuye, azadîye’ reyde dest bi qiseykerdena xo kerd û xoverdayoxê grevê vêşanîye silam kerdî.
Ozsoyî zî qiseykerdişê xo de grevê vêşanîye silam kerdî û wina va: “Rewşa winasîye de îqtîdarê AKP- MHP’yî nêeşkeno krîzê eknomîyî yê Tirkîya çareser bikero.Çunke înan bi xo welat ardo no hal.”
Ozsoyî ra dima Hemserekê HDP’yî Sezaî Temellîyî qiseykerdişêk kerd. Şarî bi slogananê sey ‘Ma HDPyî yê terorîst nîyê’ û ‘qartol, pîyaz, xatirê to Erdogan’ qiseykerdişê Temellîyî birna. Temellîyî wina qisey kerd: “Merheba embazê Îdrîs Balukenî, merheba şima rê cinîyî, ciwanî, hevalê mi. Ewro qendile ya û ez qendîla şima pêroyînan pîroz kena. Ma seba haştîye û demokrasîyî, xeylî wexto ke mucadele kenê. Ma vanê ganî heştîye, edalet û demokrasi bêro no welat. Ma Kurdî, Tirkî, Çerkezî, Lazî, seba ke pîya, bi huzur no welat de biciwîyê mücadele danê. Şaro Kurd no mucadeleyê bi anorî de hetê verî de ca gêno.
Leyla Guvene no mucadele de serkêş a. Leylaye rê silam bo. 120 rojîyo ke grevê vêşanîye de ya. Reyna hepisxaneyanê Tirkîya de 300 ra zêde embazê ma, embazê ma yê Strasbourgî, Sebahat Tuncele, Selma Irmake, Nasir Yagizî. Her kes no welat de edalet û hîqûq ra gêreno. Wazenê ke Birêz Ocalan keye û avûkatanê xo de pêvînayîşan bikero. No taleb meşrû û heq o. Ma tîya ra venga Wezîrê Edaletî danê û vanê goreyê qanûnan tê bigêro. No meseleyê sîyasetî nîyo, no meseleyê weçînayîşî nîyo. No mesele, meseleyê hiqûqî yo.
Îhtîyacîya welatî bi edaletî esta, îhtîyacîya nê welatî bi hiqûqî esta. Êdî na mesela çareser bikerê. Ma tîya ra soz danê pêroyê şaranê Tirkîya ke ma do înan reyde, seba edalet, hiqûq û haştîye mucadele bikê. Ê seba ke mucadeleyê ma û yewbîyayîya ma ra tersenê şan û şewdir hêrişê HDPyî kenê. Ma HDPyê, ma de nefret çin o,dişmenîye çin a. O mezhebê înan o, exlaqê înan o. No nêşîkîno rê ma.
Her kesî ra vano terorîst û badê cû zî înkar keno. Ti her roj meydan û televîzyonan de wina qisey kenî. Welat de problemê zîreetî esto, problemê xidayî esto û vejîno vano terorîstê zîreetî estê. Vano, ‘bîewnê nê esnafî, nê citkarî terorîst ê.’ Her kesî ra vano terorîst, şarî ano bi têrî û pey cû zî vano mi nêvat. Her roj şîdet, nefret, teda û rijnayîş ra qal keno.
Warişto ma ra va ‘Def bê şorê.’ Ti kamî welatê kamî ra kena teber? Ma cayêk ser nêşonê. Ma tîya yê, yanê welatê xo de. Ma do wayîrê welatê xo bivejîyê. Ewro zî vano ‘Ma do şorê fezaye.’ Ma do to 31ê Adare de bikê teqawit. O wext şo fezaye, şo Mars û reyna zî peyser amegerê. Merdiman rê heqaret keno, zulîm keno. Welatî rê xirabîye keno. Ma bi Sebahat Tuncele, bi Fîgen Yuksekdage, bi Selahattîn Demîrtaşî xo ver da û ma do qey çiyî xo vîr ra nêkerê. Ma ne Roboskî xo vîr ra kerd, ne zî qeyûmî.
Nêeşkenê îdare bikê, çunke sîstemê hukmatê Serekkomarîye goreyê nê welatî nîyo. 24ê Hezîrane ra nat problemi bîyî zêde. Nê probleman ver warişto vano problemê bekayî esto. Problemê bekayî nê, problemê enflasyon û bêkarîye esto. Şar debar nêkeno. Seba ke problemê bêkarîye û enflasyonî nêeşkeno çareser bikero, vano problemê bekayî esto.
Vano ma ke hukmat ra bêrê war, welat de problemê bekayî do bivejîyo meydan. De şo. Şima ke îqtîdar ra bêrê war, no welat problemanê xo hîna baş çareser keno. Welat do pêro probleman ra bixelesîyo. Şima dewlemendiya welatî bi şer û bi kara şexsîye ya xo qedena. Bi bêusûlîye welat qedena. No welat de yew problem esto û o zî îtîfaqê AKP-MHPyî yo û o zî do 31ê Adare de biqedîyo.
Qeyûmî welatî ser kerdî bela. Senî ke butçeya welatî pêşkêşê muteahîtan, tucaranê çekan kerde, qeyûman zî butçeya bajaran pêşkêşê kesanê hetê AKPyî kerde. Ma do 31ê Adare de qeyûman def bikerê û destkewteyanê şarî bidê şarî dest. Bingol ê ma yo, Çewlîg ê ma yo.
Ma do herêman de reyna bibê îqtîdar û nê pêro probleman çareser bikerê. No welat de feqîrîye esta. Çewlîg de ewro se ra 40 kes bêkar o, nêxebetîno. Kesê ke xebetînê zî nêeşkenê debara xo bikerê. Wariştê vanê ma do bi 25 mîlyar dolarî, projeye Qanal-Îstanbulî bivirazê. Bi 25 mîlyar dolarî S400an bigîrê. La derheqê Çewlîgî de qet yew proje çin o. Çunke dewlemendîya tîyayî benê û danê kesanê hetê xo.
Ewro Mêrdîn de vano ‘Ez do şima rê trena lezgîne bîyara.’ Çi îhtîyacîya Mêrdînî bi trena lezgîne esta? Mêrdîn de erazîyê zîreetî se ra 30 bîyê ziwa. Erazîyê citkaran nêmendo, nêeşkeno awe bido. Ti vana ez do trena lezgîne bîyara. No qederê ma nîyo. Ma eşkenê qederê xo bi paştarî û yewbîyayîye biafirnê. Bêrê ma pîya 31ê Adare de, bi yewbîyayîye û paştdarîye hêz bidê yewbînî û welatî bixelesnê. Bêrê ma pîya verê demokrasi û haştîye a bikê. Nika wextê demokrasi, haştîye û HDPyî yo.” ÇEWLÎG
