Tepişteyê dewaya PKK û PAJKî seba çareserîya meseleya kurdan û vera tecrîdê serê Rayberê Şarê Kurdî Abdullah Ocalanî 27ê teşrîna peyêne ra nata grevê vêşanîye kenê.
Zîndanê Kiriklarî yê Îzmîrî ra tepişteyanê grevê vêşanîye derheqê çalakîya xo de mektubêke şawite.
Tepişteyan mektube de qirkerdişê Îsraîlî yê vera Gazze şermezar kerd û vat: ”Êyê ke Tirkîya de gonîya kurdan rijnenê, sextekarî kenê û qaşo şarê Filîstînî ra bermenê. Tepişteyan pare kerd ke nê çaxî de ê hema zî nêeşkenê bi ziwanê xo pawitişê xo bikerê.
Tepişteyan bale ante tecrîdê Îmraliyî ser û vat: ”Rayber Apo nêeşkeno heqanê xo yê bingeyînan zî bişuxilno. Zîndanan de tepişteyê kurdî yê nêweşî vera nêdîyenê, înfazê embazanê ma yenê vêşnayene. La rixmê nê kerdişan zî ma do qetî çok nêşorê erdî ro. Seba ke Tirkîya krîzanê xo ra bixelisa ganî hêverî meseleya kurdan bêra çareserkerdene. Çareserîya meseleya kurdan zî bi azadîya Abdullah Ocalanî mumkîn a. Coka ma venga şaranê Kurdîstan û Tirkîya danê ke b aktîfî tewrê Hemleya ‘Abdullah Ocalanî rê Azadîye, Meseleya Kurdan rê Çareserîye’ bibê. Ma venga pêro kesan zî danê ke paştî bidê na çalakîya ma ya rûmetêne.”
Zîndanê Cinîyan ê Kayserî ra zî cinîyan ê tepişteyan bi rayîrê avûkatanê xo mesajêk şawit û vat: ”Ma sey panc embazî tewrê grevê vêşanîye bîyî. Azadîya Birêz Ocalanî seba haştîye îhtîyacîyêka pîl a. Ganî şarê kurdî wayîrê grevê ma vejîyo. Ma sey tepişteyan seba azadîya Birêz Ocalanî çi bikewo milê ma do bikerê. Ma do qetî ser bikewê.” ÎZMÎR/KAYSERÎ
