Zîndanê Ereglî yê Konya de tepişte Yakup Brukanli zî tede 40 tepişteyan vera kerdişanê xiraban û tecrîdî 4ê teşrîna verêne de dest pê grevê vêşanîye kerdbi. Brukanliyî dima 28ê teşrîna verêne de vera tecrîdî û binpaykerdişê heqan bedenê xo dabi adirî ver.
Avûkatanê Şubeyê Mersînî yê Komeleya Huqûqnasan a seba Azadîye (OHD) Brukanliyî reyde pêvînayîş kerd. Brukanliyî da zanayene ke 40 tepişteyî hucreyê yewkesî de tepişîyenê.
Avûkatan derheqê weşîya ey de nê agahîyî dayî: “Asta diyîne de bedenê ey vêşayo. Milo raşt û pey û wird destê ci vêşayê. Paştî ra şewatî ra goştê ey aseno. O nêeşken milê xo yê raştî bişuxiilno. O reyna ame berdene bi zîndanî û ame dekerdene hucre. Nika Brukanli û tepişte Osman Pinç heman hucre de yê. O nêno berdene bi nêweşxane. Revîr de destê ci pey ra kelemçekerde tedawî vîneno. Beno ke Brukanli enfeksîyon bigêro. Seba sewqê nêweşxaneyî muracat kerdo la nêwedarîyayo ci.”
Avûkatan da zanayene ke bi bahaneya cezaya dîsîplînî destûr nêdîyeno ke Brukanli keyeyê xo bivîno û vera ney nêrazîbîyayîşê xo mojna.
