Qezaya Pulurî ya Dêrsimî de teqayîş pê ameybî. Teqayîş de domanêk cuya xo vindî kerdbî û domanêk zî birîndar bîbî. Domana birîndare zî cuya xo vindî kerde. Walîtîye, eşkerayîye de vat teqemenîya ke bi dest ameya viraştene (EYP) ya; keyeyê Guloglu zî ard ziwan ke teqayîş mayîna ke 10 metreyî dûrê xeyma înan de bîya, aye ra virazîyayo
Teqayîşo ke gomê Çakilyayla yê dewa Bîlgeç ya qezaya Pulurî ya Dêrsimî de virazîya, tede Ayaz Gulogluyî (8) cuya xo vînî kerd, Nupelda Gulogluya 4 serrî ya ke bi giranî birîndar bîye zî wedarîyabî Nêweşxaneyê Unîversîteya Firatî ya Xarpêtî. Rixmê heme mudaxeleyanê ke nêweşxane de ameyî kerdene Nûpelda Guloglu cuya xo vînî kerde.
Walîtîya Dêrsimî ya ke derheqê teqayîşî de eşkerayî daye, îdîa kerd ke teqayîş rîyê teqemenîyêk ke hetê endamanê organîzasyonî ra herême de verê cû ameya ronayene virazîyayo.
Keyeyê Gulogluyî zî eşkerayîya walîtîye zûrî vete, vat ke teqayîş EYP ra nê, mayîne ra virazîyayo. Dedê domananê ke cuya xo vînî kerda Zeynel Gulogluyî zî vat teqayîş 10 metreyî dûrê xeyma înan de, cayê kaykerdişî yê domanan de virazîyayo û persa çi karê EYPyî zereyê dewe de esto. Ded Gulogluyî vat herême de operasyon zî çino, leşkerî zî çinê û texmînê xo de vat ke teqayîş rîyê mayîna ke verê cû ameya ronayene ra virazîyayo. DÊRSIM
