Weçînitoxê kurd yê ke derheqê weçînayîşê Şaredarîya Stenbolî de qisey kerdî bale antî tabelayanê kurdî yê Bedlîsî ke ameyî wedarnayene ser û munaqeşeyanê nameyê Dêrsimî ser de wina vatî: “Îqtîdar hetê kurdan de samîmî nîyo û no vindetiş do tesîrê xo bido sindoqan.”
Her çiqas ke namzedê CHPyî Ekrem Îmamoglû weçînayîşê herêmî ke 31ê Adare de pê ame de Şaredarîya Girdî ya Stenbolî qezenc kerdbî zî AKP bi piştîya Heyetê Weçînayîşî yê Berzî (YSK) weçînayîş betal kerd û qerar da ke 23ê Hezîrane de newe ra weçînayîşê Stenbolî pê bêro. Weçînitoxê kurd yê ke 31ê Adare de rayanê xo dayî Îmamoglûyî do 23ê Hezîrane de zî reyna rayanê xo bidî Îmamoglûyî.
Hetêk ra tabelayan wedarnenî û hetêk ra zî kurdan ra rayan wazenî
Hemwelatijan ra Faîk Elmaso Bedlîsî bale ant muhîmîya weçînayîşî ser û wina va: “Xeylê cayan de îtîraz ameyî kerdene. La tena yê Stenbolî ame qebûlkerdene. Weçînayîşê 31ê Adare rejîmê yew camêrdî lerzna. Wina tesîr bîyî ke Bînalî Yildirim şono herême û qala Kurdistan keno. Kesê ke heta vizêr zî vatêne çareserî peynî bîyo, ewro qala Kurdistan kenî. Hetêk ra tabelayanê kurdî wedarnenî û hetêk ra zî kurdan ra rayan wazenî. Tîya de dirîtî esto. Ez veng dana heme hemwelatîyan ‘gelo şima do senî rayan bidî îqtîdaro ke tahammulê ci tabelayêka kurdî rê çin o.’ Stenbol cayêko gird o û her rengan ra merdim tede estî.”
Her çiqas ke ê ma çin bihesibnî zî ma estî
Salîh Kaymazî da zanayene ke kurdans er de zilmêk gird esto û va: “Çi kenî wa bikerî, vindetişê ma do nêbedilîyo. Hemserekê ma se vajî ma do wina bikerî. Her çiqas ke ê ma çin bihesibnî zî ma estî.”
Wexto ke weçînayîş yeno kurd yenî vîrê înan
Cinîyan ra Maşallah Kaymaza ke taxa Kanarya de cuyena va: “35 serrî yo ke CHP taxa Kanarya ra rayan nêgirewto. Rayanê ke ewro herîneno zî bi wesîleya HDPyî herîneno. Wexto ke weçînayîş yeno kurd yenî vîrê înan. Ez umid kena ke heme çî hîna baş bibo û Îmamoglû qezenc bikero. Eke qezenc bikero zî bi saya kurdan do qezenc bikero.”
Ma do rayanê xo bidî demokrasî
Serekê Komeleya Bedlîsîjan yê Îkîtellî Nezîr Altintaşî zî qiseykerdişê xo de va: “No weçînayîş seba ma têkoşînê demokrasî yo. Do weçînayîşê 23ê Hezîrane de hêzê demokratîk qezenc bikerî. Şêx, axa, cimat û meleyî AKPyî rê xebetîyenî. Ma do goş nêdî nê polîtîkayan. Ma do rayanê xo bidî demokrasî.”
Îmamoglû çareserî nîyo, la seba ke faşîzm çin bibo, ma do rayan bidî
Serekê Komeleya Piştîdayîş û Kulturê Dêrsimî yê Îkîtellî Metîn Yildizî zî bale ant munaqeşeyanê nameyê Dêrsimî ser û wina va: “Wexto ke nameyê Dêrsimî fermî bibo, aye wext do arşîvî bêrî akerdene û vindîbîyayeyî vejîyî raşte. Ê Dêrsim çin bikerî zî ma do reyna awan bikerî. Ma kesê ke ma çin hesibnenî nêşinasnenî. Dêrsim do wayîrê îradeya xo bivejîyo. Îmamoglû seba ma çareserî nîyo, la seba ke faşîzm çin bibo, ma do rayan bidî.”
Hemşaredarê kurdan tewqîfkerde yî
Îrfan Îskenderî da zanayene ke badê serra 2015î qayûm tayînê şaredarîyanê kurdan ameyî kerdene û wina domna: “Hemşaredarê kurdan tewqîfkerde yî û wezîfe ra ameyî girewtene. AKP rant û serfkerdişî ser bîyayîşê xo domneno.”
Hewl danî ke ziwanê ma yê dayîkî çin bikerî
Sedef Atilgano ke Meletî ra yo zî qiseykerdişê xo de va: “Verê cû dikanêk ma estbî, la seba ke deyranê Ahmet kaya û yê cîya-cîyayan dayêne doşdarîkerdene ame padayene. Seba ke mi dikanê xo de deyranê kurmancî û kirmancî dayêne goşdarîkerdene, padîya. Hewl danî ke no proses de ziwanê ma yê dayîkî çin bikerî.”
Qiseykerdişê Bînalî Yildirimî yê Amedî zerrî ra nêbî
Durdane Oza ke taxa Atakent ya Kuçukçekmece de ronişena daye zanayene ke binpaykerdişê heqê merdiman aye zaf dejnena û va: “Ganî cinî bibî yew û rêxistin bibî. Na dinya mirdê ma heminan kena. Ma do mazbata tepîya bidî Îmamoglûyî. Ez kurdan rê sipasî kena. Qiseykerdişê Bînalî Yildirimî yê Amedî zerrî ra nêbî.”
Kurdan rê ame vatene ke şêrêne Başûrê Iraqî
Hemwelatîjan ra tewr peynî Azîz Yûrtî qisey kerd û va: “Goreyê weçînayîşê 31ê Adare eleqeya şar hîna zêde bîya. Kesê ke heta nika rayan dayêne AKPyî, qerarê YSKyî vera reaksîyonin î. Her kes ferqê neheqiya Îmamoglûyi de yo. Wexto ke kurd qala xoserî kerdî înan rê ame vatene ke şêrêne Başûrê Iraqî. Vatişê Bînalî Yildirimî yê Kurdistanî tesîrê xo weçînitoxanê HDPyî ser de nêkerd. Dejê ke ameyî antene tu rey nînê vîrîkerdene. Ma ciwanê ke Sûrî de ameyî kiştene û merdimê ke cêrzemînanê Cizîrî de ameyî veşnayene baş zanî.” STENBOL
