Tevgera Goran a li parlamentoya Herêma Federal a Kurdistanê xwest Tirkiye dawî li bombebarankirina xaka başûrê Kurdistanê bîne û hêzên xwe ji başûrê Kurdistanê derxe
Gelê Şêladizê li dijî êrîşên balafirên şer ên TSK’ê ku di 23’ê çileyê de gundê herêmê bombe kiribûn û 4 welatî kuştibûn bi ser qereqola leşkerên Tirkiyeyê de girt. Gelê Behdînan ku bi ser qereqolê de girt maşîneyên leşkerî û çadirên leşkeran şewitandin. Piştre balafirên şer ên TSK’ê dîsa çûn herêm bombe kirin.
Piştî serhildana gel a li dijî Qereqola Sîrê, Wezîrê Karên Derve yê Tirkiye Mevlud Çavuşoglu, bi Serokê Herêma Federal a Kurdistanê Neçîrvan Berzanî re hevdîtin kir. Neçîrvan Barzanî jî diyar kir ku dê lêpirsînê bidin destpêkirin.
Li aliyê din Tevgera Goran a li parlamentoya Herêma Federal Kurdistanê daxuyaniyek nivîskî belav kir. Tevgera Goran di daxuyaniyê de bang li Tirkiyeyê kir da ku dawî li êrîşên xwe yên li ser xaka başûrê Kurdistanê bîne û hêzên xwe ji Başûr derbixe. Tevgera Goran di daxuyaniya xwe de got: “Erka Hikûmeta Iraqê ye bi hemahengiya bi Herêma Kurdistanê re sînorên başûrê Kurdistanê biğparêze. Pirsgirêka kurd a li Tirkiyeyê bi bombebaran, kuştin û êrîşan nayê çareserkirin. Êrîş tenê hejmara qurbaniyan zêde dike. Li gorî me wê pirsgirêka kurd a li Tirkiyeyê tenê bi guftugoyên aştiyane were çareser kirin.” HEWLÊR
