Hêzên dagirker ên dewleta tirk û çeteyên wê bajaroka Eyn Îsa û Serêkaniyê bi dijwarî topbaran û bombebaran dikin. Li gundê Izahe yê Girê Spî jî şervanan li hêzên dagirkeran xist û 2 panzêr û 3 wesayîtên zirxî rûxandin
Berxwedena Rûmetê ya şervanên Hêzên Sûriyeya Demokratîk (HSD) a li hemberî hêzên dagirker ên dewleta tirk û çeteyên wê di roja 9’emîn de berdewam dike. Hêzên dagirker ên ku li hemberî şervanan di hemû eniyan de dişikên, bi tobparankirina qadên sivîlan hewl didin encamê bigirin.
Di vê çarçoveyê de balafirên şer ên dewleta tirk di van kêliyan de bakurê rojavayê navçeya Eyn Îsayê bombebaran dikin. Di heman demê de balafirên keşfê jî li ser navçeyê digerin. Her wiha li sêgoşeya navçeya Çelebiyê, Eyn Îsa û gundê Kendalê jî ji serê sibehê ve di navbera şervanan û hêzên dagirker de şerekî dijwar diqewime.
Çalakiya li gundê Izahê
Li gorî agahiyan, şervanan li derdora û hundirê gundê Izahe yê Girê Spî li konvoyekî çeteyan xist. Di encama çalakiyê de 2 panzêr û 3 erebeyên çeteyan hatin rûxandin. Hejmara kuştî û birîndarên wan nehat zelalkirin. Şerê li vê herêmê didome.
Êrîşa li dijî Serêkaniyê
Artêşa tirk a dagirker û çeteyên wê ku li hemberî derbên şervanên HSD’ê bê çare mane, hemû hêza xwe li Serêkaniyê xistiye dewrê. Dagirkeriya tirk bi obûs û tankan li bajarê Serêkaniyê didin.
