Polîsanê tirkan merkezê ci Amed xeylêk şaristanan de eşt xeylêk adres û keyeyan ser û sere de rojnamegerê kurdî, sîyasetmedar û hunermendî tewr tay 150 kesî destbend kerdî.
Polîsan eşt keyeyanê Wayîrê Ajansê Mezopotamya (MA) Ferhat Çelîk, Edîtorê MA Abdurrahman Gok, Mudirê Karanê Nuşteyan ê Yeni Yaşamî Osman Akin û Wayîrê Îmtîyazî yê Xwebûnî Kadrî Esen û xeylêk adresan ser. Polîsan keyeyî serûbin kerdî, dest na kitab û komputeran ser. Seba ke Ferhat Çelîk keye de nêbi nêame destbendkerdene.
Sereştişan de Edîtorê MA Abdurrahman Gok, muxabîrê MA Ahmet Kanbal, Osman Akin, Kadrî Esen, Hemsereka OHDyî ya Amedî Halîse Dakali, avûkatî Ozume Vurgun, Bunyamîn Şeker, Berdan Acûn, Pîrozhan Karali, Şewirmenda Hemsereka DBPyî Salîha Aydenîze Sezen Mercan, kaykerdoxê Tîyatroyê Şaristanî yê Amedî Yavuz Akkuzu, Ozcan Ateş û Elvan Koçer zî tede xeylêk kesî ameyî destbendkerdene.
Hetkarê Hemserekanê Pêroyîyan ê HDPyî Tayyîp Temelî vera sereştişan nêrazîbîyayîşê xo mojna û ard ziwan ke îqtîdar tersê binkewtişê weçînayîşan ra nê operasyonan keno.
Hetkarê Serekê Baroyê Amedî Mehdî Ozdemîrî da zanayene ke bi fermanê Serdozgerîya Komare qasê 150 kesî ameyê destbendkerdene.
Ozdemîrî vat: ”Operasyonî û cigêrayîşî dewam kenê. Sebebê operasyonan ma rê nêame vatene.”
Komeleya Huqûqnasan a Seba Azadîye (OHD) pare kerd ke Amed, Êlih û Riha de xeylêk kesî ameyê destbendkerdene.
