Teyareyanê şerî yê dewleta tirkî ya îşxalkare dormeyê Kampa Şehîd Rûstem Cudî ya Mexmûrî bombardûman kerd, di sivîlî birîndar bîyî
Goreyê xeberanê ke çimeyanê Mexmûrî ra ameyî girewtene, teyareyanê şerî yê artêşa tirkî ya îşxalkare Kampa Şehîd Rûstem Cudî ya Mexmûrî bombardûman kerd.
Ame vatene ke dormeyê kampe ame bombardûmankerdene û goreyê zanayîşanê verênan vînbîyayîşê ganî çîn o, la di kesê ke bi tesîrê teqayîşî binê herre de mendî, birîndar bîyî. Birîndarê ke ameyî berdene bi nêweşxane rewşa înan hol a. Dimayê hêrişî roniştoxê kampe keyeyanê xo ra vejîyayî û reaksîyon da.
Hêrişo ke saetanê şewe de ame viraştene de hîrê rayî bombayî ameyî eştene û wextê hêrişî de firdayîşê keşîfî zî ameyî kerdene. Ronoştoxanê kampe ra keso ko ANFyî rê qisey kerd, vat cayo ke ê tede cuyenê PKKyijî ûca çîn ê, cayê sivîlan hedef ameyo girewtene.
Dewleta tirkî menganê peyênan de vera cayanê sivîlan ê Başûrê Kurdistanî sîtematîk hêrişan kena. Teyareyanê şerî yê tirkî roja Îneyî dewa Spîndarî ya qezaya Amedîye ya Dûhokî bombardûman kerde. Hêrişî de hîrê sivîlî birîndar bîyî. Menga Hezîranî de hêrişê hewayî yê vera herêma Kortekî yê dewleta tirkî de hîrê sivîlî ameyîbî qetilkerdene û panc zî birîndar bîyîbî.
Kamapa Macîran ê Mexmûrî ke 12 hezar macîrî tede yê raya verêne nêya ke bena hedefê dewleta tirkî. 13ê Kanûna 2018î de hêrişê hewayî yê dewleta tirkî de çar sivîlanê ke asayîşê Mexmûrî de wezîfedar bî cuya xo vînî kerdebî. MEXMÛR
