Tirkîya de ziwanê sîyasetî, zaf têj o. Lîderî Prtîyan, zafê ey; aqloselim û nezaket ra dûrî kewtê, heqeretwarî yew ziwan şuxulnenê. Tebîî sebebê nê uslûbî estê. Sebebê nê ziwanî zî politikaya red û înkarî ya. Polîtîkaya red û înkarî; xo reyde uslûb û terzê sîyasetkaran zî herimnena.
Dewleta Tirkîya; hem zerrey Tirkîya de, hem zî teberê Tirkîya de politikaya şîdet û ê şerî esas gêna. Dewleta Tirkîya, bi taybetî kurdan ser o yew politikaya zorî û şîddetî pratîze kena. Bi raştî hem polîtîkaya xo ya yê zerreyê Tirkîya û yê teberê Tirkîya goreyê red û înkarê kurdan organîze kerda. Tayê demokratan ra teber, CHP, Îyî Partî, Partîya Saadetî, Partîya Gelecekî, Partîya Devayî tede, heme mûxalefet; teslîmê politikaya red û înkarî bîyê. Wexto ke mewzû kurd bo; beyntarê înan de yew ferq nêmaneno…
Sîyasetkarê partîyanê sîstemî, yewbînan; bêşerefey, alçaxey, zûrkerey,terorîstey, xayîney ra sucdar kenê. Her roj ma medya de, şahîdê nê heqaretan benê. Yew het ra heqeret yewbînan kenê, la wexto ke menfeetê înan yo ferdî û sîyasî bibo; yenê yewbînan het û heme heqeretanê yewbînan peygoş kenê. Sîyasetê înan de. yew sewîye nêmenda.
Wexto ke zereyê Tirkîya de, politikaya red û înkarê kurdan esas bigêrîyo; dîplomasî û heme têkîlîyê yê teberê Tirkîya zî goreyê politikaya red û înkarî awan benê. Yanî nê partîyê sîstemî; bi temam teslîmê polîtîkaya red û înkarî kurdan bîyê. Adeta kîmyaya înan herimîyaya. Cunku hal û ruhîyetê înan; kîn, nefret û polîtîkaya red û înkarê kurdan ser o înşa bîyo. Yew merdimo/a ke heme cuyê xo; red, înkar û îmhayê sewbîna entîsîtey û nîjadperestey ser o înşa biko/a, kulturê demokrasî û aşîtî ra dûrî maneno/a. Bi temam polîtîkaya kîn û nefretî esas gênê. Na ra têgeyr û uslûbê nê serdestan de, yew peyman nêmaneno. Vatiş û sîyaset û polîtîkaya înan de; ehlaq û nezaket nêmaneno. Her roj heqeret kurdan kenê. Kurdan û demokratan, se terorîst name kenê. La hinê heqeret yewbînan zî kenê. Kemal Kiliçdarê Serekkomar Tayyîb Erdogan;“Vatiş de/soz de Serekkomar” name kerd. Raşta ey, sîyasetê nê partîyan de cidîyet nêmendo. Sîyasetê înan zî “vatişde yo.” Çunku sîyasetê înan, heqîqet ra dûrî yo. Ispatê ey zî no yo. Hima Qanûnê Bingeyî de nasname û ziwanê kurdan qebul nêkerdo. Heme wext, goya “terorî” behane kenê. La şaşeya xo nêweynenê. Eke no xusus de, samîmîyeteya înan esta, yewerî dest û lingê înan nêbestê. Meclîsê Tirkîya de, yew roj de, wa nasname û ziwanê kurdan qebul bikê. La aseno ke, înan de, ne ina/wina yew feraset, ne zî ina/wina yew hêz esto.
Goreyê serdestan; dişmenê tewr xayînî, zerreyê Tirkîya de yê. Kam/e polîtîkaya înan rexne biko, se terorîst name kenê. Polîtîkaya teberi zî goreyê polîtîkaya red û înkarî awan kerda. Na polîtîkaya înan, teberê Tirkîya de zî zaf bazar nêveynena. Dinya, mecbur nîya ke, na polîtîkaya red û înkarê kurdan qebul biko. Kam dewleta ke, na polîtîkaya red û înkarî qebul nêko; înan se dişmen veynenê. Bi no zîhnîyetê xo; heme wext, xo rê zerreyê Tirkîya de, hem zî teberê Tirkîya de xo rê dişmenan peyda kenê. Îqtîdarê AKP/MHP adeta heme dewletan se dişmen veynenê. Bê Qetar, Azerbeycan, îqtîdarê Dewleta Lîbya û OSOyî, Dinya de, sewbîna dostê înan nêmendo.
Hetan Dewleta Tirkîya; fek polîtîkaya red û înkarî ra verranêdo, ziwanê sîyasetkaran zî nêbedilêno. Hetan polîtîkaya red û înkarî dewam biko; sîyaset zî demokratîze nêbeno. Na polîtıka realîteyê şaranê Tirkîya ra dûrî ya. Heme meseleyê Tirkîya; polîtîkaya red û înkarê kurdan ra yenê meydan.
