Seke yeno zanayene nê demanê peyênan de şerê mabenê Azerbaycan û Armenîstanî rojeve de yo. Sîyasetmedarê kurdî, dîplomatê verênî yê Yewîya Sovyetan û ronayoxê Kurdîstanê Sorî Îşxanê Aslan Ankosîyî derheqê şerê Karabagê Corî de qisey kerd.
Ankosîyî da zanayene ke şerê Karabagî 32 serrî yo ke dewam keno û vat: ”Armenîstan wazeno bi rayîrê leşkerîyî Karabag xo rê girê bido. Verî mabênê Azerbaycan û Armenîstanî de Kurdîstano Sûr estbî. Azerîya serranê 1930an de no welat werte ra wedarit. Dima armenîyan seba kurdan Karabag, Laçîn û dewanê ci de herêma otonomî awan kerde û waşt ke îdareyêk birono. Kurdîstano Sûr girêdayîyê Konfederasyonê Medan bi û tîya ra ameyêne vatene Medyaya Qijkeke. No ca kurdan ra ame diznayene. Ame vatene ke Kurdîstano Sûr sey herêmêka otonome do biameyêne şinasnayene. La dima mabênê Azerbaycan û Armenîstanî de şer vejîya û hêzanê mîyanneteweyîyan Armenîstanî rê teda kerde. Coka Armenîstanî planê otonomî vindarna. Dima zî Armenîstanî sozê xo nêard ca.”
Ankosîyî pare kerd ke înan Vekîl Mustafayevî seba Kurdîstanê Sûrî serranê 1992î de xebate kerde û Kurdîstanê Sûr ame îlankerdene. O zî bi wezîrê pawitişî. Ankosîyî vat: ”Wexto ke armenîyî ameyî Kurdîstanê Sûrî û Laçîn kurdan koçê Azerbaycanî kerd û pêro asîmîle bîyî. Verî Azerbaycan de 2 mîlyon kurdî estbî la nika uca de çew xo rê nêvano kurd.20-30 welatperwerê kurdî mendî.
Hêzê şerê Karabagî wazenê Kafkasya bigêrê binê serdestîya xo. Sey Kurdîstan tim Kafkasya ser o zî bazarîye yena kerdene. Çunke tede petrol û gaz estê. Dewleta tirke û Erdoganî no şer da destpêkerdene. Erdoganî bi hetkarîya Sûrîye û Rûsya hêrişê Rojawanî kerd. Nika karê Putin û Erdoganî yewbînan de qedîya û coka Rûsya tedaya Tirkîya kena. Tirkîya zanena ke Rûsya û hêzê bînî yê mîyanneteweyî paştî danê Armenîstan. Coka a zî mesaj dana înan. Tirkîya wazena petrol û gazê Kafkasya bivisna destî. ”
Aknosîyî ard ziwan ke eke Erdogan ser bikewo beno ke Azerbaycanî reyde hêrişê Îranî zî bikero û vat: ”Ez pê bawer nîya ke Îran mudaxeleyê na mesele bikero. Mabênê sînoranê Îran û Kurdîstanî de azerîyî estê. Beno ke siba nê bîr mabênê nê şaran de şer vejîyo. Erdoganî û dewleta tirke Sûrîye ra cergê ke kurdî qetil kerdê, ardê pêser û erşawitê şerê Karabagî. Çira? Seba ke xeyalê Osmanijan bîyarê ca û dîktatorîya xo ronê.” Çime:ANF
