Hetan eyro, AKP û MHP pey dîn û nîjadperestîye siyaset kerdo. Hetan eyro dabanê xo, bi Dînê Îslamî û nîjadperestîye xapînayo û rayê înan girewtê. La hinê aseno ke AKP mîyan de zî hinê na poltîka rexne bena.
AKP û MHP; bi na politikaya xo, Tirkîye de; tena qrîzanê ekonomîy û ê sîyasîyan vejenê. Hêvîya şaranê Tirkîya, bi tifaqa AKP û MHP nêmenda. Xora heme roj merdimê înan mîyanê AKP ra aqiltênê. Nê merdimê înan ya sewbîna partîyan de ca gênê, yan zî bêteraf manenê.
Tewr peynî de Endamê Heyetê Îstîşareyê Serekkomarîya yê Berzê Bulent Arincî, yew programê Haber Turk TVyî de vat ke; “Heq esto ke Hemserekê HDPyî yê verî Selahattî Demîrtaş texlîye bibo û semedo ke karsaz Osman Kawala tewişte/tepîşte maneno ez heyret manena. Dima zî vat ke; “Tewiştişê Demîrtaşî, wa nêtadîyo cezakerdişê ey. Seba ke hepisxaneyan de, îsyan û grewê veyşaney bîybê, Min û Demîrtaşî, 1-2 ray yewbînan dîy. Semedo ke kê Selahattîn bişinasnî, yan zî ey mehkeme kerdiş ra vernî, ganî kê kitabê ey yo ke nameyê ey Dewran o biwanî. Sebeno, nê kitabî bigêrê û biwanê.” Arincî dima zî vat ke; “No kitab, 2019 de çap bîyo. No kitab; derheqê Selahattîn Demîrtaşî de nêbo zî derheqê kurdan de û ciwîyayîşê travmaya kurdan de, sereyê (zîhnîyetê) zaf merdiman bedilneno. Dima zî Arincî, derheqê Osman Kayalayî de vat ke; “Mi îdîanameyê ey wend. Hima zî tewiştişê/tepiştişê ey rê ez heyret manena. Ganî texlîye bibo. Mi wexto ke îdîanameyê ey wendê, mi xo bi xo vat ke, gedeyî nê îdîanameyî nênusenê. Zerrîya mi waşt ke ez cubeyê xo newe ra xûrada. Ganî hepisxane ra vejîyo.”
Bulent Arincî dima vat ke, “Hem ez, hem Serekkomar Recep Tayyîp Erdogan û hem zî Wezîrê Edaletî, Abdulhamît Gul, edaletê het de ma ca gênê, ê zî wazenê ke yew mehkemaya adîl bibo, la dadgerî yaniş kenê.
Derheqê nê vatişan dima Serekkomar Erdoganî vat ke; “Heme kesan rê pêşnîyazkerdişî, terorîstan ra wendişê Kitabê yew terorîstî, heqeten ez rencîde kerda.” Dima zî Demîrtaşî; billakerdişê gonîya leşkeran, polîsan, mamosteyan û pavotoxê terorîstey ra sucdar keno. Birêz Demîrtaş, ay wext wekîl bi. Wezfeyê ey yo ay yewin; qalkerdiş bi û meseleyan rê çare veynayîş bi. Madem Tirkîye de qalkerdişê meseleyan suc o, ay wext behsê demokrasî mekê.
Mehkemeya Heqanê Mêrdiman a Ewropa, Semedo ke Hemserekê HDP yê verî, Selahattîn Demîrtaş hepisxane ra vejîyo, 20ê Teşrîne 2018 de yew qerar dayo. Eşkerakerdişê nê qerarê dima, Serekkomar Tayyîp Erdogan vat ke; “No qerar ma eleqeder nêkeno, ma vera nê qerarê; yew hemle kenê û nê gureyî qedînenê. Peymananê mîyannetewîy, qanûnanê zerrîyê ser o yê û huqûqê zerrîy zî ganî tabîyê nê hukman bibo. La semedo ke Birêz Demîrtaş, zîndan ra nêvejîyo, Mehkemeyan zî talimat Serekkomar Erdoganî ard ca û Birêz Demîrtaş zindan de vîyarda.
Hinê qanûnanê xo îhlal kenê, mudaxeleyê dadgehan kenê. Goreyê qanûnanê Tirkîye, no mudaxele yew suc hesîbîno.Tirkîye de hinê heq huqûq nêmendo. Dadger û dozgerî, bi talîmatanê sîyasetî hereket kenê.
Ez wazena ke ewta de sewbîna nimûneyan bida. Mesela Lîderê Mafya Alaattîn Çakici, bi mektub/name Kemal Kiliçdaroglûyî tehdit keno. Nameyê xo de vano ke; “Olan durzu, ez to şewta/şivika fesla/fasûlye reyra, qazoxê/singê bakla reyra dana sinasnayîş.” Yanî Kiliçdaroglûyê bi kiştişî tehdit keno. Serekê MHP Dewlet Bahçelî zî Alaattîn Çakiciyî rê wayîr vecêno, se yew qehreman û fîkîrdaşê xo lanse keno, yewna het ra zî heqeret Kemal Kılıçdaroglûyî hetkareya terorîstey ra sucdar keno.
Weçînayîşê 2014 û 31ê Edare 2019 ra pey, bê çend şaradarîyan, dest nayo heme şaredarîyanê BDPyî ser. Zafê şaredarê nê şaredarîyan dekerdê zîndanan.
Hemserekê HDP Selahattîn Demîrtaş û Fîgen Yuksekdag tede wekîlê HDP û BDP bêhuqûqey reyde girewtê û dekerdê zîndanan. Semedo ke sîyaset kerdo; îdareker û aktîstê HDP û BDP tede, bi des hezaran merdimî dekerdê zîndanan. Bi qerarnameyan; bi se hezaran karmendî, karkerî, mamosteyî kar ra vistê.
Aseno ke Tirkîya de yew bêedaletey esta. Hîvîya ma a ya ke hine Dewleta Tirkîya bêhuqûqey ra bixelisîyo. Bêhuqûq û bêwijdan nêbeno. Yew roj, huqûq û edalet heme kesan rê lazim beno.
