Nê aşmanê peynîyan de, semedo ke HDP bêro padayîş (girewtiş), tayê sîyasetkar û nuştoxê Tirkîya vanê ke; “Wa HDP bêro padayîş.” HDP bi Qanûnê bingeyî ameya sazkerdiş (ronîyaya )û Tirkîye de weçînayîşê 2018î de se ra 11,70 rayî girewtê. HDP no weçînayîş de şeş milyonî rayî girewtê û 67 wekîlî vetê. 2018 de, HDP goreyê girewtişê rayan, Tirkîye de partîya hêrin a. Qorî sîyasetkar û nuştoxê Tirkîya vanê ke “Wa Qanûnê Partîyanê Sîyasîyan bibedilîyo û HDP bêro padayîş.” Eke HDP bêro girewtiş, bi mîlyonan îradeyê weçînayoxan xesp beno. Hinê bawerîya weçînayoxanê na partî, bi nê îqtîdar û dewleta Tirkîya nêmanena. Xora heme kes zano ke padayişê partîyan çare nîyo. Çunku dabanê nê partîyan nêbedilêno. Herinda nê partîyan de, kam partî saz bibo wa bibo, no daban raya xo dano partîya xo. Rayna no daban zano ke, nê partîyan tena semedo ke heq huqûq demokrasi waşto, semedo ke meseleya kurdan, bi diyalog çareser bibo, sîyaset kerdo. Rayna no daban zano ke, nê partîyan; semedo ke Tirkîye de şîdet û ceng vindro û aşîtî înşa bibo, sîyaseto demokratik kerdo. Wazenê ke HDP terorîze bikê, la no têgeyrê înan, esla bazar nêveyneno. Aye ra eke HDP bêro padayîş û eke rayna yew weçînayîş bibo; herinda HDP de, kam partî bena wa bibo, hina zaf rayan gêna. Aye ra beno ke nameye partî bibedilîyo, la partîya nê şarê esla nêpadîna.
Hetan eyro sira reyde, Partîya HEP, DEP, HADEP û DEHAP amyê padayîş. Padayîşê DEHAPe dima, DTP saz bîya. 2009 de zî padayişê DTP dima, HDP û DBP (DBP) saz bîyê. Serekê HEPe Wedat Aydin û wekîl Mehmet Sîncar tede, bi seyan berpirsîyar û endamê nê partîyan qetil bîyê, bi des hezaran debîyê zîndanan. Hemserekê HDP Selahattîn Demîrtaş, Fîgen Yuksekdag tede wekîl û hemserekê şaredarîyan gure ra girîyayê û bêhuqûqey reyde debîyê zîndanan. Heme kes zano ke Tirkîye de; hinê heq huqûq nêmendo. Dadger û dozgerî bê îrade mendê. Dadger û dozgerî bi talîmatan hereket kenê.
Eke HDP bêro girewtiş; kurdan û demokratanê Tirkîye mîyan de yew şikîyayîş virazêno. Esil barkerdiş û barkerdoxey (barkerdoxîye); padayîşê HDP ra yena meydan. No tescîlo resmî yo. Şima heme wext vanê, ma birayê yewnan (yewbînan) î. Na senê yew birayey (birayîye) a/ya. Hima şima resmîyet de, nasnameyê kurdan û ziwanê kurdan qebul nêkerdo. Şima heme wext behsê demokrasi kenê, la şima îradeyê kurdan û demokratan dekenê binê payan, wekîl û şaredaranê înan, gurera gênê û dekenê zîndanan. Herinda nê şaredaran de şima qeyûm tayin kenê. Şima, semedo ke tena fikrê xo îfade kerdo; sîyasetkaran dekenê zîndanan, partîya înan zî padenê. No siyaset, seqet (astengdar) o. Şima yew het ra behsê reforman kenê, la yewna het ra şima wazenê ke partîyan bipadê.
Şima hem zerreyê Tirkîya de, hem zê tebere Tirkîya de, meşrûyetê xo vênê kerdo. Şima siyaseten qediyayê. Bê politikaya şîddetî, yewna çîy şima dest de nêmendo. Şima semedo ke politikaya şîdet û cengî esas gênê, ekonomi zî îflas kerdo. Şima behsê demokrasî kenê, la şima sîyasetê partîyanê kurdan û demokratan tehamul nêkenê. Xora ma rejîmê yew merdimi ra yewna çîy nêpawenê. Vajîno ke; “ No sereyi rê no qesnqyîş.” Hinê hîvîya ma bi şima nêmenda, la hêvîya ma esla ameyox ra nêbirîyaya. Yew roj mutlaq na herre ser o, heq huqûq, demokrasi û aşîtî înşa bena.
