TJA têkildarî Roja Dayikan û êrîşên polîsan a li dijî dayikan daxuyaniyek da û diyar kir ku êrîşa li dijî dayikên girtiyan, sûcê li dijî mirovahiyê û bang li hemû kesan kir ku bibin dengên dayikên laçik spî
Tevgera Jinên Azad (TJA) bi boneya Roja Dayikan daxuyaniyeke nivîskî weşandin.
TJA’yê diyar kir ku ew di pêvajoyeke dîrokî re derbas dibin û li dijî tecrîda li ser Rêberê Gelê Kurd Abdullah Ocalan çalakiya greva birçîbûnê û çalakiya dayikên laçik spî li qadan jî, berdewam dike û ev tişt hat parvekirin: “Parçekirina pargala tecrîdê ya li Îmraliyê di heman demê de dê Tirkiye, Kurdistan û Rojhilata Navîn ji tarîtiya ku têde ne rizgar bike. Di hevdîtina dawîn a li Îmraliyê hat kirin de jî aşkera bû ku birêz Abdullah Ocalan hêza çareseriyê ye. Çalakiya greva birçîbûnê ku bi pêşengiya Leyla Guven hat destpêkirin li gelek girtîgehan belav bûye û bi tevlibûna ji 7 hezaran zêdetir girtiyan berdewam dike. Dayikên girtiyan ên ku li dijî tecrîdê û ji bo piştevaniya bi zarokên xwe li ber xwe didin, li ser navê hemû jin û gelê xwe ji dil û can silav dikin. Di van rojên ku 12’yê Gulanê Roja Dayikan tê pêşwazîkirin de, dayik li ber girtîgehan û li kolanan dilê zarokên xwe û bi sedana çîrokên berxwedanê di nava laçikên xwe yên spî de dihewînin û em bang li her kesî dikin ku li berxwedana van dayikên berxwedêr xwedî derkevin. Em wekî jin dibêjin ku diyardariyek mezin a ji bo dayikan û civakê rakirina tecrîda li Îmraliyê ye. Ji ber vê em bang li jinan, gelan, hêzên demokratik, ciwanan, rewşenbîr, hunermend, nivîskar û her kesên ku xwe mirov dihesibîne, dikin ku li gel dayikan tevbigerin, nerazîbûna xwe ya demokratîk li her qadê nîşan bidin û têkoşînê geş bikin.” AMED
