AMED |
Tevgera Jinên Azad têkildarî serdegirtina polîsan a saziyê jin û gelek saziyên din û binçavkirina jinan daxuyaniyeke nivîskî weşand.
Di destpêka daxuyaniya TJA’yê de ev tişt hat gotin: “Li Tirkiyeyê di nava 18 salên desthilatdariya AKP’ê de û di hevkariya koalîsyona faşîst a AKP-MHP’ê ya dema dawî de, her tim komkujî, destavêtin, destdirêjî, desteserkirina mafan, talakirina destketî û kedê, destgîrkirin û girtin li me jinan her roj tê ferzkirin.”
TJA’yê destnîşan kir ku wê li dijî van êrîşan têkoşîna xwe tu carî ranewestînin û wiha domand: “Divê bê zanîn soza me ya ji bo azadiyê ji çekên zîhniyeta faşîst a AKP-MHP’ê xurtir e. Dewleta bi serdestiya mêr a neteweperest, rantxur, zayendîperest ku hê heye bi destgîrkirin û girtinan dikare bi jinan paşve gavê bide avêtin, divê baş zanibe ku jinên jiyana xwe kirine gorî têkoşîna azadiyê serî natewînin, çokê danînin.
Bi navê TJA’yê em careke din dibêjin ku hevalên me yên hatine destgîrkirin divê tavilê bên berdan û dawî li girtin û destgîrikrina bi rengê bêhiqûqî bê anîn. Di serî de jinan em bang li saziyên demokratîk, tevger û înîsiyatîfan dikin ku têkoşînê mezin bikin.”
