Navenda Nûçeyan |
Tevgera Jinên Azad (TJA) bi daxuyaniyeke nivîskî de Zeynep Kinaci (Zîlan) ku di 30’ê hezîrana sala 1996’an de li Dêrsimê çalakiyeke fedaî kiribû, bi bîr anî.
Daxuyaniya TJA’yê wiha ye:
“Rastiya kurd, Kurdistan û axa pîroz a Mezopotamyayê gelek jinên zanyar û berxwedêr afirandiye. Ji avabûna dîroka xaka pîroz heta niha têkoşîn, berxwedêrî, zanyarî û felsefeya wan a jînwarî û jiyarî her tim rêbertî ji jin û civakê re kirine. Her wiha felsefe, jînwarî û jiyariya wan her tim bûye dibistana azadiyê ku nifşekî bike mirazgirê nifşeke dinê û heta roja îro jî vejîn bûye felsefejiyariya jinên kurd û Rojhilata Navîn.
Ji van jinên xwedî felsefeya jînwarî û jiyarî yek jê jî sembola têkoşîn û berxwedana jinên kurd Zeynep Kinaci ye. Zeynep li dijî hişmendiya mêrsalarî û bavsalarî ya malbat û civaka feodal, li dijî hişmendiya dagirker a ku li ser xaka pîroz a Mezopotamyayê têkoşiyaye û vejiya. Vejîna wê di dîroka têkoşîn û berxwedana jinên kurd de bûye manîfestoya jînwarî û jiyanwariyê ya pêşerojê.
Em jinên TJA’yê vejîn û berxwedana hemû jinên ku ji bo azadiyê têkoşiyane, bi bîr tînin. Em sozdar û şopdarê felsefejiyariya wan in.”
