TOHAV’ê ji bo çalakiyên greva birçîbûnê banga lezgîn li CPT û NY’yê kir û daxwaz kir ku ji bo rawestandina îskence û kiriyarên xerab bên serdana Tirkiyeyê
Weqfa Lêkolînên Hiqûqî û Civakî (TOHAV) têkildarî çalakiyên greva birçîbûnê ku ji bo rakirina tecrîda girankirî ya li ser Rêberê Gelê Kurd Abdullah Ocalan berdewam dikin, daxuyaniyeke nivîskî weşand. TOHAV’ê di daxuyaniya xwe de banga lezgîn li CPT û Neteweyên Yekbûyî (NY) kir ku ji bo rawestandina îskence û kiriyarên xerab ên li zindanan serdana Tirkiyeyê bikin.
Di daxuyaniyê de çalakiya greva birçîbûnê ya Hevseroka KCD’ê Leyla Guven û girtiyan tê bibîrxistin û tê diyarkirin ku piştî grevê li zîndanan girtî rastî îskence û kiryarên xerab tên û ketine asta krîtîk. Her wiha di daxuyaniyê de tê destnîşankirin ku kontrolên tenduristiyê yên girtiyan bi awayekî hiqûqî pêk nayên û girtî di hucreyên yek kesî de tên tecrîdkirin.
Di berdewama daxuyaniyê de qala pêkanînên li dijî malbatên girtiyan jî tê kirin û tê gotin ku iskence û kiryarên xerab li hemberî malbatên girtiyan jî tê kirin û gefa destwerdanê li girtiyan tê xwarin. Di dawiya daxuyaniyê de binpêkirina mafê hevdîtina bi telefonê ya bi malbatê re û serlêdanên hevdîtina parêzaran a bi Ocalan re jî tê bibîrxistin û tê xwestin ku ji bo pêkanîna mafên mirovî yên girtiyan bi Wezareta Dadê ya Tirkiyeyê re hevdîtin bên kirin. STENBOL
