Torinê Şêx Seîdî, Bedrî Firatî dîyar kerd ke xebatê seba yewîya neteweyî bîyî umid û bale ant muhîmîya têgêrayîşo hempar yê partî û rêxistinanê kurdan ser û va: “Çareserkerdişê probleman bi kongreya neteweyî mumkun o.”
Torinê Şêx Seîdî, Bedrî Firatî xebatanê yewîya neteweyî ercna û da zanayene ke ganî partî û rêxistinanê kurdan berjewendîyanê xo veradî hetêk û seba berjewendîyê şarê kurdî bixebetî. Firatî qiseykerdişê xo de va ‘ganî şar sîyasetmedaran ser de yewîya neteweyî ferz bikero.’
Torinê Şêx Seîdî, Bedrî Firatî destpêkê qiseykerdişê xo de wina va: “Hêrişê vera qezencanê kurdan reyna nîşan da ke yewîya neteweyî çende muhîm a. Xebatê ke yenî kerdene û gamê ke yenî eştene zaf muhîm î. Kombîyayîşê temsîlkaranê partîyê kurdan umid da her kesî û kêfweşîyêko gird o. Çimkî çareserkerdişê problemanê herême bi kongreya neteweyî mumkun o. Ganî partîyê sîyasî û rêxistinanê kurdan deklererasyonêko hempare biweşênî.”
‘Nika firsendêko gird vernîya kurdan de esto’
Firatî dewamê qiseykerdişê xo de dîyar kerd ke Kurdistan de her kes yewîya neteweyî esas gêno û wina va: “Wasîyetê heme roşnvîranê ke cuya xo vindî kerdî zî yewîya neteweyî bî. Hereketê Şêx Seîdî zî seba yewîya neteweyî kurdanê vakur Sûrîye û Kurdistano Federe reyde pêvînayîş viraştbî. Nika firsendêko gird vernîya kurdan de esto. Eke no firsend seba berjewendîyê kurdan bêro şixulnayene do şarê kurd minetdar bibo. Labelê kesê ke kongre asteng bikerî do nizdî de mîyanê xayînan de ca bigêrî. Ganî berjewendîyê dişmenê kurdan nê, berjewendîyê kurdan esas bêrî girewtene.”
‘Birêz Ocalan berpirsîyarîya xo ard ca’
Firatî qiseykerdişê xo yê peyênan de wina va: “Sîyasetê kurdan hêz û qewetê xo vindetiş û têkoşînê şarî ra gêno. Ganî partî û rêxistinanê kurdan berjewendîyanê xo veradî hetêk û seba berjewendîyê şarê kurdî bixebetî. Ganî şar sîyasetmedaran ser de yewîya neteweyî ferz bikero. Seba ke reyna qetlîyam û koçbeî nêvirazîyo, ganî ma vindetişêxo yê vera dagirkerîye nîşan bidî. Birêz Ocalan berpirsîyarîya xo ard ca. Her çiqas ke pêşnîyarê Ocalanî raşt bivejîyî zî aqilê dewlete înan qebul bêkerd.” ERZIROM
