Dewleta tirke ya îşxalkere 9ê çeleyî de dewanê Cinêzûr, Derxûst, Hiseynîk û Mişrifî yê qezaya Licê yê Amedî de operasyonêk dabi destpêkerdene û taxê Licê girewtî binê ablûqa. Pê îşkence 18ê çeleyî de 8 kesî û 19ê çeleyî de zî 35 kesî sereştişan de ameyî destbendkerdene. Nê sereştişan de leşkeran roniştoxanê Licê rê gefî wendî, keyeyî serûbin kerdî û berî şiknayî.
Wekîla Partîya Demokratîke ya Şaran (HDP) ya Amedî Remzîye Tosun operasyonê leşkerî yê vera Licê jinnewsî rê ercnayî.
Remzîye vist vîrî ke şarê Licê serranê 90an ra nata pê zorî dîyeno koçkerdiş û şarî rê qoricîtîye yena ferzkerdene. Remzîye Tosun vat: ”Dima ke prosesê çareserîye qedîya nê polîtîkayê şerê taybetî zêdîyayî. Nika vera kurdan polîtîkaya qirkerdişî yena caardene. Keyeyanê Licê da zanayene ke leşkeran înan rê vato wa Licê biteriknê nêno ê do bikişîyê. La keyeyan xo ver da. Îqtîdar seba ke hukmê ci dewam bikero wina keno. La îqtîdar bizano ke pê polîtîkayanê şerî sîyaset nêbeno.”
Remzîye Tosun eşkera kerd ke AKP 18 serrî yo seba kurdan çîyêk nêkeno û polîtîkayê ci yê şerî dewamê dişmenîya vera kurdan o. Remzîye Tosun bale ante ser ke 40 serrî yo Licê de polîtîkaya şerê taybetî yena caardene û vat: ”Dewlete bi taybetî bala xo dana Licê ser. Hêrişê vera Licê qet rojdemê dewlete ra nêvejîyenê. ”
Remzîye Tosun peynîya qiseykerdişê xo de grevê vêşanîye yê tepişteyan vist vîrî û vat: ”Grevê vêşanîye netîceya tecrîdê vera Birêz Ocalanî yo. Ganî waştişê tepişteyan bêrê caardene û tedayî biqedê. Şarê Licê ra ajanîye yena ferzkerdene. Ma sereştişê Licê ra dima keyeyan reyde qisey kerd. Keyeyan vera îşkence bi hawayêkê qetî tewirê xo mojna. Şarê Licê se beno wa bibo do erdê xo nêterikno û vera polîtîkaya şerê taybetî sereyê xo nêaro war.” AMED
