Serokê DYA’yê Donald Trump bersiv da gefên Îranê û got; ‘Ger Îran êrîşî amerîkiyan bike, ji bo 52 amerîkayiyên ku Îranê berî bi salan ew rehîn girtibûn, em ê li 52 hedefên Îranê bidin. Amerîka hîn zêdetir gefan naxwaze.’
Fermandarê Hêzên Qudsê ya Muhafizên Şoreşa Îranê Qasim Silêmanî di 3’yê çileyê de li Bexdayê ji hêla hêzên DYA’yê ve hate kuştin. Bi kuştina Silêmanî re jî arêşeya di navbera DYA û Îranê de zêdetir bû. Ev arêşeye her ku diçe jî zêdetir dibe. Serokê DYA’yê Donald Trump têkildarî gefên Îranê ku dibêje dê ji DYA’yê tolê hilînin, peyamek parve kir.
Peyama Trump ku li ser twîtterê parve kir wiha ye: “Kasim Silêmanî ji xwe êrîşî sefaretxaneya me dikir. Ji bo êrîşî cihê din bike jî amadekarî dikir. Îran ji xwe bi salane ji bilî pirsgirêkan kêrî tu tiştekî nehat. Bila ev jî hişyarî be. Ger Îran êrîşî amerîkiyan bike, ji bo 52 amerîkayî ku Îranê berî bi salan ew rehîn girtibûn, em ê li 52 hedefên Îranê bidin. Hinek ji wan hedefan jî, ji bo çanda Îranê gelek girîng in. Amerîka hîn zêdetir gefan naxwaze.”
